Peshëngritësja shqiptare Evangjelia Veli është renditur në vendin e dytë të Baterisë B në peshën 53kg, në Lojërat Olimpike “Rio 2016”. Në këtë peshë garojnë 13 shtangiste, gjashtë nga të cilat e përfunduan garën dhe ishin në Baterinë B, aty ku shqiptarja u rendit e dyta me 165kg në dygarësh (e para është japonezja Yagi Kanae me 186kg në dygarësh). Në Olimpiadë nuk jepen medalje për secilin stil, por vetëm për dygarëshin, ndaj për të mësuar renditjen përfundimtare të shtangistes kuqezi në peshën 53kg, duhet pritur edhe Bateria A, që zhvillohet sot në mbrëmje (janë ende 7 sportiste në garë).
Në stilin e shkëputjes, Veli bën një paraqitje shumë të mirë, duke i realizuar me sukses të trija provat. Ajo ngre fillimisht 68kg, më pas 72kg dhe në provën e tretë 75kg, duke mos dështuar asnjëherë. Në stilin e shtytjes, shtangistja kuqezi nuk gabon në start, duke realizuar me sukses 88kg dhe më pas arrin të ngrejë lart pa probleme edhe 90kg. Në provën e tretë tenton 96kg, por dështon, duke realizuar në total 5 nga 6 provat në dispozicion. Veli e mbyll garën e saj olimpike me 165kg në dygarësh (shkëputje 75kg+ shtytje 90kg), duke qenë momentalisht në vendin e dytë.
Për momentin, Veli ka kapur edhe një vend në “top-9” shtangistet më të mira në peshën 53kg, por kjo renditje mund të përmirësohet në rast se ngonjë peshëngritëse e Batërisë A dështon, duke mos realizuar asnjë provë në ndonjë stil. Para fillimit të Olimpiadës, Veli pat deklaruar se duke mos qenë në formën optimale, pasi u kualifikua në Rio me ftesë në momentet e fundit nga ndërkombëtarët, synon një vend në tetë më të mirat. Gjithsesi, shtangistja shqiptare bëri realitet ëndrrën e saj, duke bërë edhe një paraqitje të mirë në Olimpiadë.
[fbvideo link=”https://www.facebook.com/olimpikshqiptar/videos/1188741281169221/” width=”500″ height=”400″ onlyvideo=”1″]
