Dita e djeshme, që përkon me fillimin e pushimeve të muajit gusht, ka shënuar radhë kilometrike në pikën kufitare të Muriqanit.
Përpunimi i avashtë për shkak të numrit të kufizuar të sporteleve, por edhe dyndja e mijëra pushuesve drejt plazheve të Malit të Zi apo edhe më tej, e ka gjetur të papërgatitur policinë kufitare.
Qytetarë të ndryshëm janë ankuar se radhët shkonin deri në 10 km. Por zyrtarisht drejtuesit e kësaj pike doganore u shprehën se radha në ditën e djeshme ka shkuar në rreth 2.5 kilometra. Megjithatë, ky nuk është problem i një dite.
Shoferët në shumë raste detyrohen që të presin rreth 2 orë si shkak i kordonit të gjatë të mjeteve motorike. Radha në pikun e lëvizjeve nga Shqipëria drejt Malit të Zi dhe anasjelltas shkojnë deri në 2 kilometra./panorama
I lartë është numri i shtetasve shqiptarë dhe të huaj, që hynë dhe dalin në doganën e Muriqanit. Për muajin korrik, sipas drejtuesve, në doganën e Muriqanit janë rreth 220 mijë shtetas shqiptarë dhe të huaj, që kanë hyrë dhe kanë dalë në dy anët e kufirit. Nga sa më- sohet, janë edhe rreth 65 mijë mjete motorike në total, shqiptare dhe të huaja, që kanë hyrë dhe kanë dalë në Muriqan.
Sipas raportimeve zyrtare, bëhet e ditur se përgjatë muajit korrik ka qenë shumë më i lartë numri i shtetasve të huaj që kanë hyrë nga Mali i Zi drejt Shqipërisë. Kështu janë afro 60 mijë shtetas shqiptarë dhe afro 160 mijë shtetas të huaj, që kanë hyrë dhe kanë dalë nga pika kufitare e Muriqanit.
Për rrjedhojë, edhe numri i mjeteve të huaja është më i madh. Shifra 160 mijë shtetas të huaj vjen edhe nga ardhjet e shumta të shqiptarëve të Kosovës, që në kufi përllogariten si të huaj. Velipoja dhe plazhet e Jugut janë ndër më të preferuarat për ta.
Më i pakët është numri i shqiptarëve që zgjedhin plazhet e Malit të Zi. Po ashtu, drejtuesit e doganës së Muriqanit bëjnë më dije se kontrollet në kufi janë të rrepta për të ndaluar transport të drogës, apo trafikim të qenieve njerëzore.
Edhe muaji gusht pritet të ketë radhë të gjata në Muriqan. Dita e djeshme ka shënuar pikun e fluksit, ku mijëra qytetarëve iu është dashur të presin me orë të tëra në pikun e diellit, derisa është bërë përpunimi dhe kontrolli me imtësi i personave dhe automjeteve, para se ata të kalonin në Mal të Zi.
