Kryetari i Kuvendit, Ilir Meta, ka drekuar me ishpresidentin e Republikës, Rexhep Meidani, në shoqërinë e ishdeputetit socialist Koço Kokëdhima.
Ditët e fundit, në korridoret e politikës është folur se ishpresidenti Meidani mund të jetë kandidati për Kryeministër, nëse do të kërkohet një mocion mosbesimi në Parlament ndaj Kryeministrit Rama.
Ishpresidenti Meidani nuk ka preferuar të prononcohej për mediat, por mësohet se ai ka qenë me pushime në Pogradec kur është ftuar në telefon nga kryetari i Parlamentit për një drekë, të cilën ai e ka pranuar dhe është nisur drejt Tiranës.
Dreka, e cila zgjati rreth katër orë, u zhvillua në një restorant në qendër të ishBllokut. Burime nga takimi pohuan se në të është diskutuar për situatën në të cilën ndodhet koalicioni qeverisës.
Nuk kanë munguar gjatë takimit edhe ide dhe kalkulime “për krijimin e një qeverie të re, që do të garantojë konsensusin dhe do të rikthejë besimin si te, zgjedhësit shqiptarë, por dhe te partnerët ndërkombëtarë për ecjen përpara dhe me progres, por dhe për të qenë një garant për zgjedhje të lira e të ndershme të pranuara nga të gjitha palët”.
I pari që u largua nga dreka ishte socialisti Koço Kokëdhima, i cili e cilësoi atë si një takim miqësor mes tre miqsh të së majtës. Në një prononcim për mediat, Kokëdhima tha se gjatë drekës është folur për koalicionin, i cili sipas tij ka problemet e veta.
“Nuk mendoj se kjo drekë e sotme është një arsye për të nxjerrë ndonjë konkluzion politik. Nuk ka, madje, asnjë simbolikë politike, është thjesht një drekë miqësore. Ai është një koalicion i gjallë. PS dhe LSI janë pjesët më sinjifikative të së majtës së bashkuar dhe koalicionit qeverisë. Sigurisht që ka probleme mes tyre, por këto dy parti do të kenë aftësinë edhe t’i zgjidhin problemet mes tyre”, tha ishdeputeti socialist.
Duke zbuluar atë që është diskutuar gjatë drekës së gjatë, Kokë dhima tha se koalicioni duhet të rregullojë besimin e tij me qytetarët.
“Është e natyrshme që në çdo lloj koalicioni të ketë gjithmonë probleme dhe gjëra për korrigjime, diku më shumë, diku më pak. Është e natyrshme, gjithashtu, që një koalicion të rishqyrtojë gjithmonë nivelin e besimit të partnerëve dhe të punojë për të rivitalizuar koalicionin dhe të rivendosë besimin e humbur. Nuk mendoj se ka ndonjë simbolikë të caktuar politike. Është thjesht një takim miqë sor mes tre miqsh të së majtës”, tha Kokëdhima.
IshPresidenti Meidani dhe kreu i Kuvendit, Meta, nuk kanë preferuar ta komentojnë takimin.
ARISTIR LUMEZI/ Panorama
