Deputetja demokrate Jorida Tabaku ka reaguar në facebook lidhur me investimin prej 5 miliardë dollarësh që qeveria Rama pretendon në bregun e Karpenit të Kavajës.
Tabaku i kërkon MInistres Konomi të tregojë cilët janë investitorët që duan të marrin 1700 Ha tokë publike dhe të sqarojë se pse kompania u shit në Singapor vetëm dy ditë përpara se ligji të kalonte në Kuvend.
Tabaku liston faktet që e bëjnë sipas saj, jo transparent këtë projekt negocimi:
- Kompania Britanike Star Bridge Port Limited siç është theksuar në deklaratë është krijuar në vitin 2011. Sipas të dhënave të marra nga “Companies House” (që është qendra e informacionit për kompanitë e regjistruara në Mbretërinë e Bashkuar), rezulton se kompania Britanike së cilës bëhet fjalë t’i jepet Karpeni ka dorëzuar nga viti 2013 deri në vitin 2016 Bilancin e tipit “kompani e fjetur”, pra një llogari që nuk ka pasur asnjë aktivitet tërheqje apo depozitimi në 3 vitet e fundit. (https://beta.companieshouse.gov.uk/…/07760856/filing-history). Si ka mundësi që një kompani që ka shpenzuar miliona euro në vepra të ngjashme dorëzon në Britani një bilanc të këtij lloji?
- Nga ana tjetër, kompania që ka blerë (sipas të dhënave të marra nga Companies House) kompaninë Star Bridge Port Limited, është një kompani me seli në Singapor e cila nuk mundet t’i gjendet asnjë adresë interneti për punët që ajo ka kryer. Një blerje e tillë ngre pikëpyetje jo vetëm mbi kompaninë Star Bridge Port Limited por edhe mbi raportet e saj me kompani serioze. A mundet vallë që një kompani serioze të shitet tek një kompani fantazëm që ekziston vetëm me një kuti postare në Singapor?! A mundet që një kompani serioze që ka shpenzuar miliona euro, të mos ketë projekte të saktësuara në faqen e saj të internetit?! (http://starbridgeltd.com/projectsanddevelopments.html)
- Gjithashtu nga një hulumtim mbi strukturën e kompanisë Britanike e cila pretendohet të jetë serioze në fushën e ndërtimit, si ka mundësi që nga gjithë faqet Britanike rezulton se struktura e kompanisë në fjalë është tejet e varfër për një kompani që do të shpenzojë 5 miliardë euro, pra sa 1/5 e shumës së TAP?! (https://companycheck.co.uk/…/STAR-BRI…/directors-secretaries) Dhe i gjithë ky investim do t’u realizoka nga një kompani që nuk ka as edhe një punonjës, por vetëm një Bord Drejtorësh?
Sipas saj, nuk ka asnjë plan konkret dhe asnjë të dhënë të saktë për sa i takon kompanisë, e për rrjedhojë nuk mund të flitet për negocim.
