Për t’iu ardhur në ndihmë maturantëve që janë në fazën vendimtare të përzgjedhjes së degëve ku dëshirojnë të vijojnë studimet e larta, gazeta zbardh kuotat e tarifat që ky universitet do të aplikojë për studentët që pranon këtë vit në auditore.
Ndryshe nga universitetet e tjera që kanë rritur kuotat e pranimeve, Universiteti i Mjekësisë ka vendosur t’i ulë ato me qëllim për t’iu përshtatur kapaciteteve pritëse.
Kështu, degës së Mjekësisë edhe këtë vit i janë ulur edhe 10 kuota, duke e çuar numrin e pranimeve në 230, po aq sa kapaciteti pritës që ofron fakulteti.
Po ashtu, sipas vendimit të senatit për kuotat e tarifat, e përmbledhur në tabelën përbri shkrimit, Infermieria ka ulur gjithashtu numrin e pranimeve në 274, nga 300 të një viti më parë. Ndërsa tarifa që duhet të paguajnë studentët e rinj mbetet e njëjtë, 40 mijë lekë.// Panorama
