Edi Rama prej 48 orësh ka nisur betejën e tij për të siguruar 71 vota me çdo kusht, me t’u dhënë sinjali i parë, se Ilir Meta ka dalë nga koalicioni.
Nga ana tjetër, ai ka nisur bisedat me Ilir Metën, nëpërmjet një “ndërmjetësi”, ku sipas informacioneve konfidenciale, ai është Nard Koka. Burimet nuk bëjnë me dije se deri në çfarë niveli kanë arritur bisedimet dhe sa mundësi ka që të dy palët të bien dakord njëra me tjetrën. Por se kanalet e komunikimit mes dy liderëve të mazhorancës, tani për tani, mbeten të hapura.
Ndërsa nga opozita, është mësuar, se rolin e ndërmjetësit mes Sali Berishësh, Lulzim Bashës dhe Ilir Metës e luan Fahri Balliu. Informacionet e para tregojnë se bisedimet mes PD-së dhe LSI janë në terma më të qarta për momentin, por duke njohur mjaft mirë, zigzaket e Ilir Metës në politikë, ende nuk mund të flitet për një version përfundimtar.
Pak orë më parë, u bë me dije, se kreu i LSI-së Meta është takuar me Koço Kokëdhimen, në shtëpinë e këtij të fundit, ku mësohet se takimi ka zgjatur rreth një orë, me shumë gjasa në fokus të këtij takimi mund të ketë qenë çështja e mocionit të mosbesimit.
Ndërkaq, në këto çaste, në Kryesinë e Kuvendit ka nisur takimi mes Ramës, Bashës dhe Metës. Zyrtarisht është mësuar se Rama-Basha-Meta po diskutojnë për një pikë të vetme, që është propozimi hibrid i Zv.Sekretares Amerikane të Shtetit, Viktoria Nuland.
