Nga Dritan Laci
Në 18 muaj janë grabitur, bashkë me të sotmen, plot 5 milion euro në tre supergrabitje spektakolare. Asnjë shkrehje arme. Asnjë i vrarë apo i plagosur. Asnjë tentativë qoftë edhe më minimalistja për të reaguar. Të gjitha të kryera ne prani të kamerave të sigurisë. Të gjitha në ambiente super të populluara nga policia, kamerat, security dhe banditë qe vijnë e ikin nga bankat dhe aeroporti me thasë me lekë, si të ishin fantazma dhe jo qenie njerëzore me identikit, me ID, gjurmë gishtash, pehash flokësh e me radhë.
Aq sa sot e kemi të vështirë të tregohemi kaq naiv sa të besojmë se tre leshko grabitës, a ca më shumë në rastet e mëparshme, janë kaq të aftë të thyejnë një bankë, një aeroport, ditën per diell, pa u ndihmuar nga një strukturë e mirëfilltë mafioze, me gjasa me fije që mbërrijnë deri lart në pushtet.
Aq sa edhe më naivi në rruzull do të ngrinte disa pikëpyetje.
Kush do të guxonte 20 vite burg të grabiste aeroportin, pa pasur një mbeshtetje të fortë nga pas?
Kush do të guxonte të ndeshej me policë të armatosur në aeroport dhe të humbiste qoftë edhe jetën në një përplasje fizike të mundshme gjatë grabitjes, pas pasur mbështetje të fortë nga pas?
Kush do të guxonte të sharronte aeroportin në mes të ditës, pa pasur mbështetje nga pas?
Kush do të guxonte të hynte me maskë në aeroport në sy të kamerave dhe gjindjes pa pasur një mbështetje nga pas?
Kush? Kush? Kush?
Kush kur as kamikazët e Stambollit nuk guxuan të vendosnin maska, sepse automatikisht maska në një ambient të tillë do të thotë objekt i paidentifikuar me precedencë për tu neutralizuar pa paralajmërim
Por kush po i organizon këto supergrabitje?
Kush po i fsheh banditët?
Ku po shkojnë paratë?
Kush po i përdor këto para?
Si është e mundur që askush nuk shikon, askush nuk dëgjon, askush nuk vepron…
Të paaftë apo të aftë që kanë marrë detyrën të jenë të paaftë?!
Do kemi prapë një deklaratë: “Policia po punon për zbardhjen e ngjarjes”.
A kemi të bëjmë me një organizatë të strukturuar bashkëpunëtorësh?
A mund të jemi kaq naivë sa të besojme qe tre lapangjozë të marrin guximin të thyejnë aeroportin dy ditë pas ngjarjeve në Stamboll pa pëlqimin e një organizate mafioze që fillon vertikalisht nga pushteti dhe zbret deri në strukturat drejtuese të aeroportit deri të zbatuesit e vegjël…..
A është kjo grabitje e sotme thjesht një hajdutëri kartmonedhash, apo duhet ta mendojmë edhe si një akt mirëfilltazi të pashpallur lufte, për sa kohë është thyer siguria e aeroportit kryesor të vendit.
A nuk është ky akt i sotëm një pushtim pa luftë i aeroportit të vetëm të vendit. Po të mendojmë që thyerja e protokollit të sigurisë së aeroportit të një vendi që përfshihet në pikat strategjike, është mirëfilltazi pushtim dhe cënim i rëndë i sovranitetit të një vendi.
Pse nuk reagon kryeministri Rama?
Ku statusi i tij i fundit daton para tre orësh; citoj Parlamenti italian heq detyrimin e transportuesve shqiptare për Dirito Fisso dhe taksën e qarkullimit. Grazie Renzo.
Z. Kryeministër të është thyer siguria e aeroportit te vetëm ndërkombetar që ke.
Dhe ti nuk shkruan qoftë edhe një fjalë të vetme.
Tani po dyshoj fort nëse je mirë. Të paktën ashtu si na qetësove dy netë më parë, na thuaj edhe tani që je mirë, mos na lej me zemër të ngrirë.
Po ministri i Brendshem pse nuk reagon. Si mund të heshtë në një situatë të tillë?
Po Presidenti i Republikës, a duhet ta kishte mbledhur Këshillin e Sigurisë?
Po sikur larg qoftë këta të mos ishin thjesht ca grabitës, por të ishin terroristë që mund të rrëmbenin avionët në pistë? A duhet të kishit reaguar po kaq fuqimisht?
