Ministri i Brendshëm, Saimir Tahiri ka reguar pak minuta më parë në profilin e tij në Facebook, duke hedhur poshtë akuzat e ngritura nga Partia Demokratike.
Kjo e fundit e akuzoi Tahirin për lidhje me Klemend Balinin, personin e akuzuar nga mediat greke si “Eskobarin e Ballkanit”.
Mediat e vendit fqinj, i janë referuar një hetimi të policisë së tyre.
“Sipas PD, vete ne, Policia e Shtetit & DEA e SHBA & Policia Greke po heton me sukses nje grup kriminal te lidhur po me ne, me mua dhe drejtuesit e policise. Ne SHQUP nuk ka kufi as mediokriteti e as makuteria politike per te sulmuar cdo rezultat te policise. Vertete kaq naiv i konsiderojne shqiptaret???”, – ka qenë deklarata e ministrit të Brendshëm.
Më herët, reagoi edhe vetë ministria e Brendshme, e cila nëpërmjet një njoftimi zyrtar, ndër të tjera nënvizonte se “Policia e Shtetit në bashkëpunim të ngushtë me Policinë greke dhe DEA-n e Shteteve të Bashkuara të Amerikës si dhe me Policitë e disa vendeve të BE-së, janë duke kryer një ndër operacionet më të gjera kundër trafikimit të lëndëve narkotike në rajon dhe zonën e BE-së.
Bashkëpunimi për këtë operacion nisi disa muaj më parë dhe përfshin një shkëmbim intensiv të dhënash, përdorimin e metodave speciale të hetimit dhe veprime hetimore të përbashkëta në disa shtete.
48 orët e fundit janë kryer disa arrestime të anëtarëve të kësaj organizate kriminale në vendin fqinj, Greqi, por edhe shtete të tjera, ndërkohë që hetimet vijojnë.
Për shkak se operacioni është ende në zhvillim, nuk mund të bëhen publike detaje që cënojnë këtë hetim.
Ndërkohë, Policia e Shtetit shpreh indinjatën e saj rreth akuzave tërësisht abuzive nga Partia Demokratike”.
