Ministri i Punëve të Brendshme Saimit Tahiri tha se është i gatshëm të përballet me drejtësinë nëse akuzat e forta që lideri i opozitës Lulzim Basha bëri mbrëmë në “Opinion” janë të vërteta.
Kreu demokrat akuzoi me emra drejtues të Policisë së Shtetit për lidhje të tyre me Emiljano Shullazin, me kushërinjtë Habilaj të ministrit Tahiri dhe me botën e krimit. Sakaq Basha akuzoi se “arma që ju gjet Elton Çiçës i përket një drejtuesi të lartë të policisë”.
Nëse këto akuza janë të vërteta – tha Tahiri- atëherë Basha a bëjë publike dosjen dhe ta cojë në Prokurori.
Pyetje: Zoti Tahiri, opozita ka një pretendim se disponon një listë me 18 efektivë të inkriminuar. A jeni në dijeni të kësaj?
Ministri Tahiri: Më kanë bërë të ditur që kjo është deklaruar dje nga kryetari i Partisë Demokratike në një emision. Gjithsesi, unë e ftoj të bëhet politikan serioz. T’i lërë fjalët e kota, ta bëjë publike, ta çojë në Prokurori. Ka disponibilitetin tonë të plotë për çdo hetim në raport me akuzat që thotë se ka. Përndryshe, me llafe pazari për të mbushur studiot televizive, unë nuk kam kohë të merrem.
