Milan do të “burgoset” në Milanello. Humbja e pësuar kundër Atalantas ka konfirmuar krizën e kuqezinjve dhe trajneri Sinisa Mihajlovic ka dhënë urdhrin: “Të gjithë të grumbulluar, nga dita e sotme deri të shtunën. Kemi marrë 2 pikë në katër ndeshje kundër ekipeve që janë mbrapa nesh në renditje. Nuk është e pranueshme, i kërkoj falje tifozëve”.
Trajneri serb ka qenë i zhgënjyer nga mentaliteti i lojtarëve: “Na mungon agresiviteti, humbasim shumë dyluftime. Tani duhet të shihemi në sy dhe të tregojmë se sa vlejmë”, kanë qenë fjalët e teknikut kuqezi.
Vendimi për ta mbajtur ekipin të grumbulluar është marrë nga vetë Mihajlovic në përfundim të ndeshjes së sotme. “Kam lajmëruar Gallianin, i cili ka folur me Berlusconin: klubi është dakord. Do të qëndrojmë të grumbulluar deri të shtunën, kur do të përballemi me Juventusin”.
Trajneri ka folur edhe për problemet e ekipit të tij: “I kam thënë lojtarëve se çfarë duhet të bënim sot, kemi pasur edhe fatin të kalojmë në avantazh: duhej ta kishim mbyllur ndeshjen, por nuk e kemi bërë. Por nëse pas 31 ndeshjes kemi gjithmonë të njëjtat probleme do të thotë se kemi mangësi”.
Që nuk kanë lidhje me aspektin fizik: “Jo, është një çështje përqendrimi dhe agresiviteti dhe Milanit nuk mund t’i mungojnë cilësi të tilla. Do të qëndrojmë të grumbulluar për të kthjelluar mendjen dhe për të zgjidhur problemet që kemi”.
Në lidhje me të ardhmen: “Kam probleme më serioze se kontrata, mungojnë akoma disa ndeshje para fundit dhe duhet të luajmë në finalen e Kupës së Italisë. Llogaritë do të bëhen në fund”, ka thënë trajneri kuqezi.
