Ministria e Drejtësisë ka nxituar t’u dërgojë për konsultim disa institucioneve, ligjin e korrigjuar për armëmbajtjen, pasi varianti i miratuar nga Kuvendi u rrëzua nga Gjykata Kushtetuese.
Ligji është shumë më i zbutur sesa ai i hartuar nga Ministria e Brendshme dhe mund të paraqesë një pikë të re përplasjeje edhe vetë brenda Qeverisë.
“Me këtë ligj ne dënojmë më shumë për armëmbajtje pa leje se për terrorizëm”, deklaronte shumë më parë se të shprehej Gjykata Kushtetuese, ministri i Drejtësisë ka mbajtur të njëjtin qëndrim të butë për riformulimin e paragrafit të armembajtjes pa leje në mjediset publike.
Dënim me burg nga dy deri në pesë vjet. Ky është projekligji i ri i shpërndarë nga Ministria e Drejtësisë mbi paragrafin 4 të nenit 278, i shfuqizuar tashmë e që flet për mbajtje pa leje të armëve, bombave e lëndëve plasëse në mjedise publike.
I konsideruar nga Gjykata Kushtetuese si i ashpër pasi sanksiononte burgim nga 7 deri në 15 vjet gati të njëjtë si veprat e trafikimit, mungesa e kësaj dispozite ka shkaktuar konfuzion në gjyqësor.
Në kushtet kur gjykatat kanë pezulluar gjykimet ndaj të pandehurve për këtë akuzë, pasi kjo dispozitë tashmë nuk ekzsiton, Ministria e Drejtësisë vë në lëvizje grupet e interesit për të marrë opinion mbi propozimet e reja.
Opinion pritet edhe nga Prokuroria e Përgjithshme, e cila në fundjavë njoftoi Kuvendin për situatën. Nuk dihet ende nëse Ministria e Brendshme do të miratojë këtë propozim, aq më tepër që ministri i Brendshëm, Saimir Tahiri ka qenë propozues dhe hartues i ligjit të ashpër të armëmbajtjes, rrëzuar nga Kushtetuesja.
Nga ana e saj, edhe Gjykata e Lartë ka pezulluar një gjykim penal për armëmbajtje pa leje në mjedise publike dhe dërguar për interpretim në Gjykatën Kushtetuese sesi kuptohet ky vendim pas vakuumit të krijuar.
Aktualisht, shumica e proceseve gjyqësore me të arrestuar për armëmbajtje pa leje në mjedise publike, janë pezulluar.
Në relacionin shoqërues për projekligjin, Ministria e Drejtësisë thotë se Kodi Penal për armëmbajtjen pa leje që prej 1995 është ndryshuar pesë herë./TCH
