Premier League nuk ka qenë asnjëherë kaq befasuese sa në këtë sezon. Në tetë muajt e fundit kemi parë përmbysje të vazhdueshme në renditje për sa i takon vendeve të para dhe pothuajse çdo javë kemi qenë dëshmitarë të një lufte shumë të ashpër sportive.
Katër ekipet tradicionale, që dominonin kampionatin anglez, Arsenal, Chelsea, Manchester City dhe Manchester United tani po luftojnë për të siguruar një pozicion në kompeticionet europiane.
Ndërkohë, skuadra si West Ham dhe Southampton kanë ngushtuar ndjeshëm diferencat.
Tottenham është në vendin e dytë para rivalëve të Londrës veriore Arsenal, ndërsa Manchester City mban vendin e katërt.
United është në vendin e gjashtë dhe kampionët në fuqi të Chelsea janë të 10ët. Por surpriza më e madhe është Leicester City.
“Dhelprat”, që një vit më parë ishin në vendin e fundit në renditje në këtë periudhë, tani kryesojnë Premier League me një avantazh prej pesë pikësh ndaj “Spurs”.
Claudio Ranieri shkoi, pa dhe duket se do të pushtojë Anglinë pasi nuk ka arritur ta bëjë këtë me Chelseain më shumë se një dekadë më parë.
Tani është përcaktuar edhe numri i pikëve që do t’i duhen Leicester City për ta realizuar ëndrrën historike. “Decision Technology”, një kompani britanike që merret me analizat sportive, ka përllogaritur sa pikë do t’i duheshin një ekipi për t’u shpallur kampion i Anglisë në këtë sezon.
Sipas parashikimeve të kësaj kompanie, kryesuesve të kampionatit, Leicester, do t’i duheshin edhe 10 pikë më shumë në shtatë ndeshjet e mbetura.
Kompania në fjalë ka përdorur një algoritëm për të përcaktuar se sa pikë janë të mjaftueshme për të fituar kampionatin dhe numri magjik është 76.
Në 10 sezonet e fundit është regjistruar një mesatare prej 84.7 pikësh të domosdoshme për të fituar kurorën.
