LEZHË- Një ngjarje e paprecedent është shënuar në Lezhë. 40 vjeçari Arben Uka i njohur si këngëtar tallavaje në qytetin e Lezhës përmes kërcënimit të vajzës së mitur kishte vjedhur për një kohë të gjatë fqinjin e tij.
Uka është arrestur pas denoncimit të shtetasit me iniciale A.M. Ai ka thënë në polici se vajza e tij 10 vjeçe nxënëse e klasës së tretë vidhte lekë në shtëpi dhe ia çonte Arben Ukës i cili e mbante vajzën nën presion përmes kërvcënimeve. Bëhej fjalë për shuma 10 mijë, 20, por edhe 30 mijë lekë të vjetra.
Pasi nuk kuptonte se nga humbnin paratë në familje, i zoti i shtëpisë ka zbuluar se ajo që i vidhte paratë ishte vajza e tij 10 vjeçe. Në momentin që është zbuluar, e mitura ka pranuar veprimin e saj, por i ka thënë të atit se kishte qenë e detyruar t’i merrte për t’ia dhënë fqinjit të tyre, Arben Uka. Sipas saj, ky i fundit i kërkonte herë pas here që të merrte para fshehurazi në shtëpi, në të kundërt ai e kërcënonte se do t’i bënte keq asaj dhe familjes së saj.
E gjendur në këto kushte, e mitura i ka rrëfyer babai të saj që ishte detyruar të merrte paratë dhe t’ia jepte fqinjit. Menjëherë pas kësaj, babai i të miturës i është drejtuar Policisë së Lezhës.
Pas kallëzimit të kryer, policia ka shkuar në banesën e Ukës duke bërë arrestimin e tij. 40 vjeçari është akuzuar për “shtyrje të të miturit në krim” dhe “shtrëngim me anë të kanosjes ose dhunës për dhënien e pasurisë”.
Burime të Policisë bënë të ditur se pas arrestimit, Uka është marrë në pyetje. Por ai ka mohuar të ketë lidhje dhe as dijeni me akuzat që i janë bërë. “Kjo është gënjeshtër e vajzës. Nuk kam dijeni dhe as nuk i kam kërkuar kurrë para. Hetoni dhe gjeni kujt ia ka dhënë në të vërtetë këto para, nuk jam unë personi që i ka poseduar dhe as nuk kam dijeni për to”, mësohet të ketë deklaruar ai në Polici.
Mësohet se i arrestuari Uka njihet në Lezhë si këngëtar tallava. Ai këndon nëpër lokale nate, kryesisht gjatë verës, në zonën e Shëngjinit. Ai bashkë me familjen e të miturës ishin zhvendosur së fundmi në një godinë të vënë në dispozicion nga ana e Bashkisë për familjet e pastreha.
