Disa ditë më parë, trajneri i kombëtares, Xhani De biazi, në një intervistë për “blick” deklaroi se sulmuesi i Grasshopersit Shani Tarashaj nuk ka më vend në ekipin shqiptar. Trajneri i kuqezinjve deklaroi se lojtari nuk i është përgjigjur menjëherë ftesës së Shqipërisë ndaj dhe ai nuk e ka më në planet e tij.
Ndërkohë lidhur me deklaratat e De Biazit ka reaguar edhe talenti, Shani Tarashaj i cili nuk ndihet aspak në faj për mosaktivizimin në kombëtaren shqiptare.
Në një intervistë ekskluzive për “Telegrafin”, 20-vjeçari ka treguar prapaskenat e bisedimit të tij me De Biazin si dhe ka reaguar ndaj fjalëve të italianit.
“Në kohën kur më ka kontaktuar trajneri De Biazi, kam qenë shumë i angazhuar në klub pasi më është dhënë rasti për të luajtur titullar dhe kam dashur të fokusohem vetëm te Grasshopers për ta mbajtur formën.
Gjithashtu kanë qenë disa procedura të ushtrisë që jam duke e kryer dhe kam qenë jashtëzakonisht i ngarkuar në ato kohë dhe nuk është e vërtetë që unë i kam kthyer përgjigje negative De Biazit. Unë nuk ia kam mbyllur derën Shqipërisë por as Shqipëria nuk ma ka mbyllur mua derën. Mos aktivizimi im te Shqipëria është vetëm dëshirë e trajnerit italian.
De Biazi nuk mund të bëhet më shqiptar dhe më patriot se unë pasi kam shumë anëtarë të familjes që kanë luftuar për këtë tokë dhe këtë vend dhe nuk mund të ma ndalojë askush fanellën e Shqipërisë apo Kosovës.
Jam rritur me dashuri ndaj vendlindjes sime dhe atë dashuri nuk mund të ma shuajë një italian. Duhet të skuqet ai për ato fjalë të pavërteta që ka thënë, duhet t’i vije turp nga vetja e tij pasi me fjalët e tij ja ka thyer zemrën një djali të ri shqiptar”, deklaron Tarashaj.
