Mund të duket e habitshme, por nëse e thotë një arbitër i vjetër i kampionatit shqiptar dhe njëkohësisht një mbledhës i mirë i historisë së këtij futbolli si Uvil Zajmi, kjo që do të themi më poshtë mund të duket e besueshme. Enver Hoxha ishte tifoz i ekipit të Kavajës.
Ja çfarë shkruan Uvil Zajmi në shkrimin e botuar në gazetën “PanoramaSport” me titull:”Besa, kualifikimi i madh në kohën e tollonit, por kishte fans Enver Hoxhën”
“Dihet botërisht që Enver Hoxha ka qenë tifoz i Besës. Kjo simpati ka lindur në vitin 1965, kur Besa mori kupën e gazetës “Bashkimi”, duke mundur në finale Tomorin e Beratit 3-1. Surprizë ishte takimi-gjysmë final, në të cilin Besa fitoi ndaj Apolonisë 11-0 dhe 7 gola realizohen nga Hasan Gërmenji. I entuzaizmuar Enver Hoxha e fton skuadrën në një bashkëbisedim drejtues e lojtarë duke deklaruar publikisht se ishte tifoz me Besën. Me aprovimin e tij, grumbullimet skuadra i bënte në Konvaleshencën, ngjitur me Bllokun në Plazh te Plepat, ku nuk lejohej të afrohej askush në atë zonë.”
Duket e çuditshme po të kihet parasysh që Kavaja ishte nga të parat qytete që u ngritën për të rrëzuar komunizmin, me parrulla kundër Enver Hoxhës. Edhe pse Enver Hoxha nuk thuhet të jetë parë ndonjëherë në tribunën e një stadiumi shqiptar.
