TIRANË- Drejtoria Arsimore e Sarandës shkëput kontratën me agjencinë e udhëtimit që transportonte nxënësit në shkolla pas incidentit të Borshit. Burime për Opinion.al nga Ministria e Arsimit thonë nuk kishin dijeni mbi gjendjen gjyqësore të shoferit që u përfshi në incident dhe madje nuk ka asnjë lloj inormacioni për asnjë nga shoferët që transportojnë fëmijë dhe mësues në shkolla. “Ky është një vakuum ligjor”, thonë ata. “Dëshmia e penalitetit nuk u kërkohet drejtuesve të mjeteve që transportojnë mësues dhe nxënës, sepse ligji nuk e parashikon”, citojmë burimet.
Por si funksionion transporti në zonat e largëta
E para me tenderim dhe e dyta me financim të drejpërdrejtë. Në rastin e parë Drejtoritë Arsimore të rretheve pajtojnë një agjenci udhëtimi për të bërë transportin kundrej një fondi të caktuar. Në rastin e dytë kur tenderi dështon, DAR kalon paratë në numrin e llogarive të prindërve apo mësuesve që bëjnë kilometra për të shkuar në shkollë. Konkretisht në rastin e Sarandës, DAR kishte bërë tender dhe kishte shpallur fitues një agjenci udhëtimi të licensuar. Ndërmjet të punësuarve ishte edhe F. Lala, 59 vjeç, banues në Borsh. Vetëm një ditë më parë ky drejtues mjeti u qëllua me armë në rrugë pasi ishte në hasmëri me një bashkëfshatar. Shoferi i furgonit të nxënësve ishte një person i dënuar me 7 vite burg për vrasje.
