Skandali i Serverit të Tatimeve, ku në dhjetor të vitit 2013, njerëz të paautorizuar kopjuan 4.3 milion deklarata të bizneseve duke ndërhyrë në Serverin e Drejtorisë së Përgjithshme të Tatimeve, ka shënuar një tjetër skandal brenda skandalit. Dhe kjo ndodh vetëm pak ditë pasi u publikua fakti që Prokuroria e Tiranës ka mbyllur dosjen duke mos gjetur asnjë shkelje penale në ndërhyrjen në Serverin e Tatimeve. Opinion. al ka siguruar emailet komunikuese midis deputetit Spartak Braho, audituesve Ermal Beqiri dhe Olsian Karapici, ish-shefit të hetimit tatimor në vitin 2013 Ahmet Prençi dhe prokurorit të çështjes i identifikuar me inicialet J.Z, të cilët në bashkëpunim krijojnë për Prokurorin e çështjes pyetjet qe ai duhet ti bëjë Renald Ristës, ish-drejtori të IT-së në Drejtorinë e Përgjithshme të Tatimeve Renald Rista. Pikërisht personit i cili denoncoi i pari skandalin e vjedhjes së të dhënave në Serverin e Tatimeve, fakt për të cilin me 5 dhjetor u mor në hetim nga Prokuria e Tiranës në cilësinë e personit që dyshohej se kishte kopjuar e më pas fshirë të dhënat kompjuterike të katër viteve të fundit në Drejtorinë e Tatimeve. Ndërkohë që pamjet e mëpasme filmike tregojnë se si Spartak Braho, Ermal Beqiri dhe persona të tjerë futen në Serverin e Tatimeve. Pikërisht këta persona të cilët nëpërmjet komunikimit me email dalin zbuluar si ndërhyrës në punën e organit të akuzës, me qëllim akuzimin e Renald Ristës. Vetëm pak ditë më parë News 24 publikoi vendimin e plotë të pushimit të çështjes nga ana e prokurorisë ku pavarësisht hetimeve të “thelluara” ndaj ish drejtorit të IT dhe ekspertit privat kompjuterik të Ikubinfo, për akuzat e ngritura nga drejtoresha aktuale e Tatimeve Briseida Shehaj, rezultoi se këta shtetas nuk kishin kryer asnjë ndërhyrje në rrjet dhe me veprimet e tyre nuk kishin konsumuar asnjë vepër penale. Por cilat ishin prapaskenat që u luajtën nga zyrtarë të lartë të shtetit gjatë fazës së hetimit. Opinion.al zbardh për herë të parë shtatë komunikimet e fshehta nëpërmjet emailit të zhvilluara mes zyrtarëve të lartë të tatimeve, ekspertëve të grupit të auditit dhe deputetit Spartak Braho. Komunikimet nëpërmjet emailit janë zhvilluar gjatë datës 13 dhe 14 dhjetor 2013, pra rreth 22 ditë pas ngjarjes. Pyetjet përfundimtare me natyrë tendencioze që prokurori i çështjes i ka bërë ish drejtorit të IT, rezulton se janë hartuar nga Ahmet Prençi (Drejtori i Hetimit Tatimor), Ermal Beqiri, Olsi Karapici dhe Spartak Braho (personi që ia ka nisur më pas prokurorit J.Z). Kjo gjë provon kapjen e pastër të organit të akuzës nga segmente politike dhe qeverisëse. Këto materiale provojnë më së miri tentativën e këtyre personave për devijuar hetimin dhe për t`ia faturuar dikujt tjetër kopjimin dhe marrjen e të dhënave të Serverit, të dhena këto që konsiderohen konfidenciale dhe të një rëndësie të veçantë. Klonimi i të dhënave u provua vetëm pas mbërritjes së përgjigjes nga ekspertiza e kryera e serverave. Po cilët janë emailet që u janë dërguar prokurorit të çështjes.
Email i parë është me titull: IT dërguar ditën e premte 13 dhjetor 2013 ora 12 : 06, nga Ahmet Premçi në llogari të ermalfr@yahoo.fr me dokument bashkëngjitur word: Pyetje për IT (14 KB).
Emaili i dytë është nga adresa : ermalfr@yahoo.fr që rezulton të jetë e Ermal Beqirit, e cila i dërgohet email Ahmet Prençi me përmbajtje : “Ju faleminderit. Ju kthen pergjigje për 30 min.” . Email ky që është nisur në po të njëjtën datë ora 12:12 (6 minuta më vonë).
Emaili i tretë është nga adresa “Olsi Karapici” <olsikarapici@gmail.com> i dërgohet : “Ermal BEQIRI” <ermalfr@yahoo.fr>, përgjigje me përmbajtjen “attached pyetjet për IT” , ora 12 41.
Email i katërt , nga adresa e Ahmet Prençit Ahmet.Prenci@tatime.gov.al>, i dërgohet email me përmbajtjen “Pyetjet për IT”, adresës braho2000@hotmail.com , ora 13:21.
Emaili i pestë nga adresa e ermalfr@gmail.com [ermalfr@gmail.com] on behalf of Ermal BEQIRI [ermalfr@yahoo.fr] i dërgohet Ahmet Prençit dokumenti word me titull :Pyetjet për IT”, ora 14:58.
Emaili i gjashtë: nga adresa e “ermalfr@gmail.com [ermalfr@gmail.com] on behalf of Ermal BEQIRI [ermalfr@yahoo.fr]” i dërgohet Ahmet Prençit emaili me titull “Pyetje tjetër” me përmbajtje “A i keni shoqëruar ju specialistët e auditit të MF në dhomën e serverave me punonjësit tuaj, Robert Shahini, Sokol Ibraj dhe Andi Agaraj për të monitoruar punën e tyre në dhomën e serverave dhe a keni mbajtur procesverbale për këto veprime?” , në orën 16:04.
Emaili i shtatë është ditën e shtunë datë 14 dhjetor 2013 ora 12:25 nga adresa e Ahmet Prençit, e cila i dërgohet email Spartak Brahos në adresën braho2000@hotmail.com me titull “TI së bashku me pyetjen e fundit” dhe bashkëngjitur dokumenti word “Pyetjet për TI (15 KB)”
