Piloti i drogës, Riformato alibi me vizitën e Papës

TIRANË- Piloti italian Giorgio Riformato sot ka dhënë një alibi të re para gjykatës, duke thënë se në Shqipëri ndodhej si një biznesmen i interesuar për të ngritur një agjenci turistike. “Duke menduar se kishte fluks udhëtarësh për vizitën e Papës erdha të hap një agjenci për udhëtime”, tha ai para gjykatës. Riformato gjendet në bankën e të akzuarve pasi avioni “piper” me të cilin udhëtonte nga Italia në Shqipëri pësoi defekt dhe mbeti në rërën e Divjakës ne pranveren e vitit te kaluar. Pak metra më larg policia gjeti një fuoristradë me drogë dhe arrestoi drejtuesin Saimir Bajrami. Të dy akuzohen për transport të lëndëve narkotike. Ndërsa Bajrami ka pranuar akuzën që në fillim, Riformato vazhdon t’i qendrojë asaj që ka thënë se nuk ka lidhje me drogën. Në fillim është shprehur se ishte në Shqipëri për turizëm, ndërsa sot thotë se ishte i interesuar të zhvillonte edhe biznes. Për Saimir Bajramin ai tha se nuk e njihte. “Nuk e kuptoj pse më mbani në burg”, u shpreh Riformato në gjykatë, duke kerkuar lirine.