Aeroporti i Vlorës, është kthyer në një “shënjestër” mes aksionerëve për shkak të konflikteve midis tyre.
Gazetari Berat Buzhali, i ftuar në emisionin “Opinion” në Tv Klan, sqaron fillimisht se i gjithë thelbi i konfliktit midis Behgjet Pacollit dhe Valon Ademit, lidhen me aksionet.
“Tek aksionet. Ka pasur dakordësi, që Valon Ademit i takojnë 48% apo 49% e aksioneve.
Në komunikimet që këta kanë pasur gjatë gjithë kohës, që prej vitit 2021, ka dakordësi që aksionet i takojnë Ademit. Mbi çfarë merite? Zoti e di, por që e ka konfirmuar Behgjeti. Jo vetëm që e ka konfirmuar Behgjeti. Behgjeti e ka autorizuar me prokurë Valon Lukën që t’ia bëjë kontratën”, tha gazetari.
Drejtuesi i emisionit “Opinion”, Blendi Fejvziu, shprehet se pretendimi i Mabco Construction SA është që personi që ka firmosur marrëveshjen nuk ka pasur konfirmim për këtë kontratë. Gazetari Buzhala, sqaron se Pacolli ka autorizuar administratorin e kompanisë së tij, Valon Lukën, për nënshkrimin e marrëveshjes, por më pas e ka shkarkuar.
“Behgjeti e ka dhënë firmën dhe ka nënshkruar kontratën prej atij Valoni tjetër, Valon Lukës. Behgjet Pacolli pastaj e ka shkarkuar Valon Lukën”, tha gazetari.
Aeroporti i Vlorës është një koncesion tejet i rëndësishëm, ku deri më tani shteti nuk është përfshirë. Por, një përfshirje e shtetit mund të çonte në arbitrazh. Për këtë, Buzhala mendon se ekziston mundësia e një përballjeje mes Pacollit dhe kryeministrit të vendit, për të gjetur një zgjidhje.
“Unë e besoj që në një moment të caktuar, zoti Behgjet Pacolli do të ulet me qeverinë shqiptare, me Edi Ramën dhe do ta gjejë zgjidhjen. Nëse s’ka marrëveshje mes Pacollit dhe qeverisë shqiptare, kjo çështje do të çojë në arbirtrazh, do të njollosë edhe projektin e aeroportit”, tha ai.
Sakaq, sipas gazetarit, për shkak të konflikteve mes aksionerëve, ka pasur dhe një zhvillim pozitiv për aeroportin e Vlorës, janë përshpejtuar punimet e saj.
“Behgjet Pacolli me kompaninë e vet po i kryen punimet, sepse i ka ndarë punët. Valoni me pistën, Behgjet Pacolli me objektet. Për shkak të këtyre konflikteve që kanë me njëri tjetrin, i kanë përshpejtuar punimet që të dalin para Edi Ramës dhe të fajësojnë njëri-tjetrin që ky është mbrapa. Pra, kjo zënka mes tyre ka ndikuar pozitivisht në përshpejtimin e punëve”, tha ai.
