Komisioni i Ankimimeve dhe Sanksioneve vendosi ditën e sotme, që mandati i vetëm që fitoi Nisma Shqipëria Bëhet në zgjedhjet e 11 majit, t’i kalojë Ana Dajkos, e cila ishte renditur e para në listën e mbyllur të koalicionit në Tiranë.
Në këtë mënyrë KAS vendosi rrëzimin e pjesshëm të kërkesës ankimore të Lëvizjes Shqipëria Bëhet, e cila donte që mandati t’i kalojë Adriatik Lapajt.
Pas vendimit të KAS, Lapaj ka reaguar përmes një postimi në rrjete sociale, teksa thotë se për subjektin e tij politik po zbatohet një “ligj tjetër”, ndryshe nga sa është vepruar me partitë e tjera.
“Pra, PSD-së i pranohen dorëheqjet dhe mandati kalon te lista e hapur. Neve jo që jo!
Për ne zbatohet tjetër ligj se ne jemi kulak.
Jam aq shumë krenar që luftoj për garën e hapur! Do vijë dita e asaj që po kërkojmë. Një ditë ky vend do ketë garë”, ka shkruar Lapaj.
