Në një intervistë për Klan Kosova, ish-kryeministri i Kosovës, Hashim Thaçi vlerësoi rrugën e Shqipërisë drejt Bashkimit Evropian dhe rolin e kryeministrit Edi Rama.
Thaçi tha se Shqipëria po përmbyll me sukses tranzicionin demokratik dhe po konsolidon institucionet, duke u bërë një shtet i respektuar në rajon dhe më gjerë.
Gjatë kësaj interviste ai theksoi se Edi Rama po udhëheq një transformim modern dhe optimist, duke e bërë Shqipërinë një shembull dhe duke “bërë historinë evropiane të shqiptarëve”.
“Shqipëria! Pas tri dekadash me ngritjet dhe rëniet e veta, Shqipëria po e përmbyll në mënyrë mbresëlënëse tranzicionin demokratik. Sot, Shqipëria është një vend i respektuar dhe i besueshëm nga bashkësia ndërkombëtare. Është nder kur shihje Shqipërinë të udhëhiqte takimet e Këshillit të Sigurimit, me agjendë të koordinuar me SHBA-të dhe fuqitë tjera perëndimore. Shqipëria e zhveshi para botës agresionin rus në Ukrainë. Edi Rama po dëshmon vizion të shëndetshëm e modern me plot optimizëm dhe besim. Edi po e transformon dhe emancipon Shqipërinë dhe shqiptarët. Edi po e bën historinë evropiane të shqiptarëve“, deklaroi Thaçi nga burgu i Hagës.
Ai ka vënë në dukje edhe rëndësinë e mbështetjes së Shqipërisë ndaj Kosovës dhe rolin e saj si lider në paqe dhe zhvillim në Ballkanin Perëndimor.
Në të njëjtën intervistë, Thaçi foli edhe për sfidat personale dhe privimin e lirisë gjatë qëndrimit të tij në Hagë. Ai e përshkroi situatën e tij si një “peshk pa ujë”, duke theksuar se përkundër kushteve të vështira, “shpirtin ia merr vetëm ai që ia ka dhënë“.
Thaçi shprehu bindjen se populli i Kosovës mbetet i lirë përjetësisht dhe theksoi rëndësinë jetike të mbështetjes ndërkombëtare, veçanërisht atë të SHBA-ve, në rrugën drejt pavarësisë dhe përparimit të vendit.
Kujtojmë se ish-Presidenti i Kosovës ndodhet në paraburgim në Hagë që prej nëntorit 2020, pas dorëheqjes së tij për t’u përballur me akuzat e ngritura nga Dhomat e Specializuara të Kosovës. Ai është i akuzuar për krime lufte dhe krime kundër njerëzimit që dyshohet të jenë kryer gjatë periudhës mars 1998-shtator 1999, gjatë dhe pas luftës për pavarësinë e Kosovës.
