Izraeli beson se Irani mund të rimarrë uraniumin e pasuruar të varrosur nën njërën nga tre objektet e goditura nga forcat amerikane muajin e kaluar. Lajmi bëhet i ditur nga burime mediatike për prestigjiozen britanike, BBC.
Duke folur për gazetarët amerikanë, zyrtari tha se arritja e uraniumit të pasuruar në Isfahan do të ishte jashtëzakonisht e vështirë dhe çdo përpjekje do të shkaktonte sulme të reja izraelite.
Donald Trump ka pohuar vazhdimisht se sulmet ajrore dhe raketore të SHBA-së mbi Iranin në qershor “shkatërruan” objektet bërthamore të vendit, edhe pse disa agjenci të inteligjencës amerikane kanë mbajtur një qëndrim më të kujdesshëm.
Irani mohon se synon të zhvillojë armë bërthamore dhe thotë se pasurimi i uraniumit është për qëllime paqësore.
Në një konferencë për gazetarët në Uashington, zyrtari i lartë izraelit – i cili nuk pranoi të identifikohej – tha se inteligjenca tregon se një pjesë e madhe e uraniumit të pasuruar të Iranit është varrosur në Isfahan, i cili u godit nga raketa lundrimi të lëshuara nga nëndetëset gjatë “Operacionit Midnight Hammer” më 22 qershor.
Megjithatë, zyrtari nuk shprehu shqetësim në lidhje me vlerësimin, duke vënë në dukje se çdo përpjekje iraniane për të rikuperuar materialin ndoshta do të zbulohej.
Sipas zyrtarit, vlerësimi i Izraelit është se programi bërthamor i Iranit është vonuar dy vjet. Trump dhe anëtarët e administratës së tij kanë qenë të bindur se objektet bërthamore iraniane u shkatërruan plotësisht.
“Siç e ka thënë shumë herë Presidenti Trump, Operacioni “Midnight Hammer” i shkatërroi plotësisht objektet bërthamore të Iranit”, tha zëdhënësja e Shtëpisë së Bardhë, Anna Kelly, në një deklaratë dërguar mediave amerikane. “E gjithë bota është më e sigurt falë lidershipit të tij vendimtar.”
Vlerësimet e inteligjencës amerikane kanë qenë më të kujdesshme, me një raport paraprak të rrjedhur të Agjencisë së Inteligjencës së Mbrojtjes që arrin në përfundimin se, ndërsa të tre vendet – në Fordo, Natanz dhe Isfahan – u dëmtuan rëndë, ato nuk u shkatërruan plotësisht.
