Ministri i Brendshëm Ervin Hoxha dhe ai i Mbrojtjes, Pirro Vengu, shoqëruar nga kryebashkiaku Gledian Llatja dhe prefekti Ilir Bejtja inspektuan sërish sot landfillin e Elbasanit, i cili për rreth një javë pati qenë nën pushtetin e flakëve.
Gjatë fjalës së tij, kryebashkiaku Llatja u shpreh se operacioni për shuarjen e flakëve ishte i vështirë dhe se falë punës së palodhur të gjithë strukturave u vu në kontroll.
Gjithashtu ai u shpreh se ka pasur probleme me mbetjet në qytet këto ditë, pasi ishte e pamundur që të transportoheshin në vendepozitim për shkak të zjarrit. Por po transportohen dhe situata do normalizohet.
Ministri Brendshëm Ervin Hoxha u shpreh se përpos të tjerave, kishin ardhur në Elbasan për të falenderuar 45 forcat që ndihmuan në fikjen e zjarrit. Sipas tij aktualisht situata është e qetë dhe zjarri është menaxhuar.
Megjithatë ministri Hoxha shtoi është bërë dëmi në mjedis dhe lindin detyra për riorganizimin e strukturave në landfill. Ai nënvizoi se për zjarrin ka një hetim dhe se materialet i janë referuar prokurorisë.
Ministri i Mbrojtjes, Pirro Vengu nga ana tjetër deklaroi se tashmë do vijohet me masat parandaluese dhe disa prej tyre janë monitorim me kamera termike që të ndërhyhet shpejt dhe në kohën e duhur sa herë që mund të ketë situata.
Po ashtu ai theksoi se ka një grup pune edhe me ekspertizë të huaj që do të japë një vlerësim për situatën.
Zjarri në landfillin e Elbasanit zgjati për rreth 6 ditë dhe shkaktoi shqetësime tek banorët e qytetit dhe të zonave përreth për pasojat në shëndet duke thënë se tymi dhe smogu kanë qenë të padurueshëm.
Lidhur me ngjarjen, Prokuroria e Elbasanit ka nisur një hetim për të përcaktuar shkaqet e ndotjes dhe origjinën e zjarrit./tvklan
