Të ndihmosh dikë në një moment të vështirë është instinkt njerëzor, por ndonjëherë, edhe dëshira më e mirë mund të sjellë pasoja të rënda.
Në emisionin “Rudina” në Tv Klan, instruktorja e Kryqit të Kuq Shqiptar, Sindi Zaka, tregoi tre nga gabimet më të zakonshme që bëjmë në dhënien e ndihmës së parë dhe që shumica prej nesh nuk e dinë se janë të gabuara.
Rudina Magjistari: Dhënia e ujit në raste emergjence, sa herë që shohim dikë që i bie të fikët, ose që i ndodh diçka gjëja e parë që bëjmë është që e lagim dhe i japim për të mirë? Por, është diçka e mirë, apo diçka e gabuar kjo?
Sindi Zaka: Një nga gjërat që ne bëjmë gjithmonë, me tendencën për të bërë mirë, ose për të stabilizuar gjendjen e personit që mund të jetë në gjendje të fikti, ose tani që jemi në sezonin e verës është që t’i japim ujë, por uji mund të shkaktojë diferencë shumë të madhe të temperaturave.
Ne japim ujë të ftohtë në një kohë kur trupi është dehidratuar dhe ka arritur një temperaturë më të lartë se sa temperatura normale e trupit dhe prandaj nuk duhet të japim ujë për këtë diferencën e temperaturës. Diçka tjetër ne nuk e dimë se nga ka ardhur kjo gjendje e të fiktit. Mund të ketë ardhur nga një hemorragji e brendshme dhe nëse ne i japim ujë, kjo do e përkeqësonte akoma më keq gjendjen e personit. Për ta ndihmuar ne mund ta lagim tek pjesa mbrapa qafës, tek buzët, por jo t’i japim ujë për të pirë.
Rudina Magjistari: Një tjetër pyetje është heqja e trupave të huaj nga plagët. Instinkti na shtyn që t’i heqim nëse ka ndodhur ndonjë aksident, çfarë duhet bërë në të tilla raste?
Sindi Zaka: Në rastet kur personat janë të përfshirë në një aksident, ku një trup i huaj ka hyrë në pjesën e trupit të njeriut, absolutisht është e ndaluar që ai objekt i huaj nuk duhet të hiqet.
Nuk e heqim, sepse këtë plagë me një trup të huaj mund ta çojmë në një trup me gjakderdhje dhe pastaj duhet të kalojmë në një tjetër trajtim, jo për mobilizim, por për trajtim për gjakderdhje.
Rudina Magjistari: Kemi raste djegiesh në lëkurë dhe mendja me atë logjikën e thjeshtë thotë ‘vendosim akull, që të ulim temperaturën’, por në fakt çfarë duhet bërë?
Sindi Zaka: Është bërë tashmë e njohur edhe djegia nga akulli dhe ne çfarë bëjmë që gjatë djegies duam që ta parandalojmë, ose ta ndalojmë procesin e djegien. Sepse djegia është një proces që nis tani dhe vazhdon, ka tendencën që të shkojë në thellësi.
Akulli në vend që ta parandalojë që të shkojë në thellësi, e çon akoma më shpejt. Duhet trajtuar me ujë të rrjedhshëm jo shumë të ftohtë, me një temperaturë mesatare për 15 deri në 20 minuta. Mos i hidhni as kripë, sepse kripa dehidraton ujin. E mira është që ta mbulojmë me fashë sepse plagët e djegies kanë tendencën që të infektohen./tvklan
