Gjykata e Posaçme AntiKorrupsion (GJKKO), ka ndryshuar sot, 7 korrik, masën e sigurisë ndaj Jamarbër Malltezit. Ky i fundit është liruar nga masa e “arrestit në shtëpi”.
Në një deklaratë për mediat, ai tha se ky vendim u mor 20 muaj pas privimit të lirisë.
Sipas informacioneve, GJKKO ka marrë këtë vendim, kundrejt një garancie pasurore prej 3 milionë lekësh, të vënë në dispozicion nga Malltezi.
I pyetur se çfarë do të bëjë tani, pas një kohë relativisht të gjatë brenda katër mureve, u përgjigj kështu:
“Do i falem Zotit, do shkoj në palestër dhe do kujdesem për fëmijët e mi.”
Malltezi ritheksoi se mungon fakti penal nga ana e Prokurorisë së Posaçme.
“Është për të qeshur, por në mungesë të faktit penal, përsëri vazhdojnë në mbajtjen e urdhrave që nuk burojnë nga bindja e tyre. Ata shkuan në palaçollëk politik deri në limite.”
“Do jem në të gjitha seancat dhe do përballemi. Ka kaq shumë gjëra qesharake sa nuk ua merr mendja”, përfundoi ai.
Jamarbër Malltezi akuzohet për korrupsion pasiv dhe pastrim parash për dosjen e shumëpërfolur të privatizimit të ish-kompleksit Partizani në kryeqytet.
Sipas SPAK, ai ka përfituar të ardhura në vlerën e 5.4 milionë eurove nga një biznes ndërtimi në mënyrë të parregullt, falë vendimeve të qeverisë të marra nga vjehrri i tij, ish-kryeministri Sali Berisha.
