Temperaturat e larta të verës na përballin me rrezikun e goditjeve nga i nxehti. Këto të fundit janë episode që ndodhin kur trupi mbinxehet nga ekspozimi i gjatë në temperatura të larta, çka kërkon ndërhyrje të menjëhershme.
Simptomat më të para janë rrahjet e përshpejtuara të zemrës, i folur i ngadaltë, zverdhje, dhimbje koke e deri në gjendje të fikëti. Sindi Zaka nga Kryqi i Kuq Shqiptar, këshillon përmes programit “Aldo Morning Show” në Tv Klan që masa e parë mbrojtëse është hidratimi dhe një shishe ujë duhet të na shoqërojë ngado.
Në rast se shohim dikë që përjeton nga i nxehti, ajo përshkruan hapat që duhet të ndërmarrim për t’i dhënë ndihmën e parë.
Sindi Zaka: Goditjet nga i nxehti mund të vijnë si pasojë e temperaturave shumë të larta ose si pasojë e dehidratimit të trupit, prandaj ne këshillojmë që gjatë gjithë kohës personat që dalin të kenë shishe uji me vete ose disa lëngje të tjera që të evitohet dehidratimi i trupit.
Aldo: Shishe uji se këto të tjerat kanë sheqer.
Sindi Zaka: Edhe jo vetëm personat në moshë, por edhe personat që mund të kenë probleme me zemrën, probleme kronike, janë të predispozuar që ndoshta të përballen me një valë të nxehti ose goditje të nxehti.
Aldo: Megjithatë, ne që e shohim në rrugë nuk e dimë nëse ky person vuan nga zemra ose është ndonjë xhaaxhi që pasi ka pirë kafen i ka futur edhe një teke se është ilaç thonë, se ndodh kjo, është si traditë dhe i ra pika, a ku di unë si e thonë, i ra të fikët.
Sindi Zaka: Një goditje nga i nxehti mund ta dallojmë nga djersë të ftohta, personi mund të zverdhet apo nga momenti në moment mund të këputet.
Aldo: Çfarë të bëjmë ne që e shohim nga trotuari tjetër?
Sindi Zaka: Menjëherë duhet t’i afrohemi dhe në qoftë se personi mund të jetë në gjendje të fikëti, duhet ta lëvizim personin në një vend me hije apo të krijojmë hije në pamundësi të lëvizjes së personit.
Aldo: Por na kanë thënë mos e lëviz.
Sindi Zaka: Prandaj po thosha që nëse ne nuk e lëvizim, duhet t’i krijojmë hije, t’i zëmë diellin dhe më pas mund të vazhdojmë me një veprim siç është lagia e fytyrës me ujë apo kontrolli i vetëdijes dhe i frymëmarrjes.
Aldo: Ky kontrolli i vetëdijes, kam parë shumë veta që i gjuajnë për t’u përmendur.
Sindi Zaka: Jo! Kontrolli i vetëdijes duhet bërë duke i folur, duke i kërkuar bashkëpunim sepse sado që mund të jetë i pavetëdijshëm përsëri mund të dëgjojë, duke i kërkuar bashkëpunim ose duke i shkaktuar një dhimbje të vogël me pickim, por jo duke i gjuajtur.
Zaka këshillon që mos t’i jepni ujë menjëherë personit sepse mund të përkeqësoni situatën. Kryesorja është të zotëroni emocionet dhe informacionin që keni dhe të telefononi urgjencën sa më shpejt.
Sindi Zaka: Gjëja e parë që është pikë kyçe, është të kontrollojmë emocionet tona si dhënës të ndihmës së parë që të kemi aftësinë të ruajmë dhe të zotërojmë mirë informacionin që kemi dhe të japim ndihmë. Të marrim në dorë situatën, të largojmë gjithë personat e tjerë që kanë një keqinformacion apo gjithmonë nga dëshira e mirë duan të ndihmojnë. Telefonohet menjëherë ambulanca dhe direkt do të vazhdohet trajtimi i personit./tvklan.al
