“Në jug të Shqipërisë, 20 kilometra larg nga qyteti i Sarandës ndodhet Syri i Kaltër. Një atraksion turistik, një park natyror, i cili tërheq vizitorë të shumtë nga mbarë bota, jo vetëm vendas,” raporton gazetarja Dorina Muhaj.
Një mrekulli e natyrës e rrethuar nga gjelbërimi. Syri i Kaltër, një vend me ngjyrë magjepsëse nga bluja e errët te e kaltra e çelët.
Një oaz qetësie dhe vendi ideal për të kaluar një ditë ndryshe. Ky park natyror po zbulohet çdo vit e më shumë nga vizitorët. Sipas të dhënave, ka rritje të numrit të vizitorëve krahasuar me një vit më parë deri me 15%.
“Vitin e kaluar, për të njëjtën periudhë, për periudhën e qershorit ka qenë rreth 50 mijë turistë, ndërsa këtë vit po i afrohemi 60 mijë. Ne kemi rritje mbi 10% të turistëve, kryesisht janë turistë të huaj, por shohim dhe një trend nga turistë vendas që e frekuentojnë parkun natyror.”
Turistët janë individualë apo të organizuar në grupe. Turistët e huaj janë kryesisht nga vende europiane, ndërsa nuk mungojnë as ata që vijnë nga kontinente të largëta.
“Ne vimë nga Greqia, vimë për herë të parë këtu dhe na pëlqeu shumë fare.” “Vij nga Anglia, hera e parë. Është shumë bukur.”
Kohët e fundit është përmirësuar jo vetëm infrastruktura në zonë, por janë shtuar edhe shërbime të tjera për të tërhequr sa më shumë vizitorë. “E pashë syrin e kaltër, është shumë bukur, më pëlqen shumë natyra.” “Është bukur këtu, jo vetëm uji edhe natyra përreth. Është si një përrallore.” “Është shumë bukur, nga këtu do të shkojmë për në Krujë për të parë kalanë, po kalojmë një kohë shumë të mirë.”
Vizitorët nuk zgjedhin vetëm për burimin, i cili është monument kulture, por edhe për natyrën në parkun natyror.
“Vlerat natyrore të Syrit të Kaltër në fakt janë të fokusuar te burimi si një hidro-monument ose gjeo-monument, por vlerat janë akoma më të shumta sepse sipërfaqja që e rrethon Syrin e Kaltër, që sot ka emrin e parkut natyror, ka një biodiversitet të pasur sa i përket florës dhe faunës, por jo vetëm, edhe të monumenteve të natyrës.”
Syri i Kaltër ka shumë për të zbuluar nga monumente të parkut të kulturës, por edhe nga elementë të tjerë si thellësia e ujit që ende nuk është përcaktuar. Klan News
