Zëdhënësi i Kremlinit, Dmitry Peskov, ka deklaruar se ndërhyrja e SHBA-së në konfliktin midis Izraelit dhe Iranit do të çojë në “një spirale tjetër të tmerrshme përshkallëzimi”.
SHBA dhe Rusia mbështesin palë të ndryshme në këtë konflikt. Teksa Donald Trump kërkon një “dorëzim të pakushtëzuar” nga Irani dhe po shqyrton mundësinë e goditjeve ushtarake ndaj tij, Moska i sheh iranianët si një aleat kyç.
Në fillim të këtij viti, Vladimir Putin nënshkroi një traktat partneriteti strategjik me homologun e tij iranian, Masoud Pezeshkian, i cili thekson zhvillimin e bashkëpunimit në fushën e mbrojtjes dhe sigurisë.
Irani gjithashtu ka furnizuar Moskën me dronët Shahed, të cilët kanë luajtur një rol të rëndësishëm në luftën e Rusisë kundër Ukrainës. Ministria e Jashtme ruse ka dënuar sulmet e Izraelit si “cinike” dhe “të pabazuara”, ndërsa dje, 18 qershor, zv.ministri i Jashtëm rus, Sergei Ryabkov, paralajmëroi SHBA-në që të mos japë ndihmë ushtarake Izraelit.
“Kjo do të destabilizonte në mënyrë dramatike të gjithë situatën,” tha ai. Kjo situatë vendos Moskën dhe Washingtonin në një rrugë përplasjeje mbi krizën Izrael-Iran, dhe mund të përbëjë një pengesë të madhe në marrëdhëniet midis Rusisë dhe SHBA-së, të cilat kanë qenë në përmirësim që prej rizgjedhjes së Donald Trump. /tvklan.al
