Gjatë vitit 2024, në Shqipëri janë regjistruar 22.102 vdekje, duke u rritur me 816 vdekje në krahasim me vitin 2023, ose 3,8% më tepër.
Sipas raportit të INSTAT, 97% e vdekjeve kanë ndodhur si pasojë e shkaqeve natyrore, duke shënuar një rritje prej 0,4 pikë përqindjeje krahasuar me vitin 2023, ndërsa si pasojë e aksidenteve janë shënuar 1,9% e vdekjeve në total. Krahasuar me 2023, vdekjet nga aksidentet janë ulur me 0,5%.
“Vrasësi” kryesor i shqiptarëve vijojnë të mbeten sëmundjet e aparatit të qarkullimit të gjakut, me mbi 11.600 vdekje në vit.
Sëmundjet e qarkullimit të gjakut përbëjnë 52,9% të totalit të vdekjeve, nga 51,7% në vitin 2023. Brenda këtij grupi, vdekshmëria më e lartë, prej mbi 39%, shkaktohet nga sëmundjet kronike të zemrës, 23,2% nga sëmundjet ishemike të zemrës, ndërsa 20,6% nga sëmundjet e enëve të trurit.
“Simptoma, shenja dhe sëmundje të papërcaktuara mirë” zënë vendin e dytë të vdekjeve me 21,5%. Brenda këtij grupi, vdekjet nga pleqëria përbëjnë 70,7%. Ndërkohë që “tumoret” renditen në vend të tretë me 15,3% të totalit të vdekjeve, duke u ulur me 0,4% në krahasim me 2023.
Tumoret malinje të aparatit të tretjes, tumori i mushkërive, si dhe tumoret e organeve urogjenitale janë llojet e sëmundjeve kancerogjene që shkaktojnë vdekshmërinë më të lartë. Klan News
