Michael Schmid, presidenti i Eurojust ishte i pranishëm në Forumin e Prokurorëve të Ballkanit Perëndimor në Tiranë. Ndërsa u shpreh tejet i lumtur me mënyrën si është pritur në Shqipëri, tha se ky rajon ka një rëndësi të veçantë për të.
“Është kënaqësi për mua të jem sërish në Tiranë. Mbrëmë ne patëm mundësi të shikonim mikpritjen e shqiptarëve, me organizimin e eventit. Rajoni i Ballkanit Perëndimor ka qenë gjithmonë shumë i rëndësishëm për mua, unë jam austriak dhe Austria ka lidhje të veçantë me këtë pjesë të rajonit, edhe gjuha e nënës time është sllovene. Para se të caktohesha si President i Eurojust, kam punuar si pikë kontakti për Kolegjin e Ballkanit Perëndimor.”
Vitet e fundit, pohoi ai, është rritur bashkëpunimi mes vendeve të rajonit në goditjen e krimeve të ndryshme.
“Projekti për Ballkanin Perëndimor është efikas, objektivi kryesor është të rrisim besimin reciprok dhe për bashkëpunim ndërkufitar në rajon, por edhe mes Ballkanit Perëndimor dhe BE-së. Janë konfiskuar mallra të paligjshme në numër të lartë, grupe hetimore të përbashkëta, vetëm nga vendet e këtij rajoni. Këto ekipe janë marrë me goditjen e krimeve si trafikim i drogës, pastrim parash, më shumë se 50 çështje janë mbështetur nga vendi juaj.”
Gjatë fjalës së tij ai konfirmoi mbështetjen e Eurojust për anëtarësimin e Shqipërisë dhe vendeve të rajonit në BE
“Të lehtësohet rruga juaj drejt anëtarësimit në BE. Ne bëjmë vlerësimin tonë vjetor lidhur me progresin për bashkëpunimin gjyqësor dhe dua t’ju garantoj që mund të besoni me ne. Mbështesim rrugën tuaj drejt Bashkimit Evropian dhe do ishte kënaqësi e madhe nëse do bëheshit vend anëtar.”
Forumi Konsultativ i Prokurorëve të Përgjithshëm dhe Specialë të Ballkanit Perëndimor, synon të forcojë bashkëpunimin ndërmjet prokurorive të rajonit për adresimin e sfidave ligjore dhe krimeve të organizuara.
