Ministrja e Turizmit dhe Mjedisit, Mirela Kumbaro ka inspektuar sot hapësirat publike të plazheve në Shëngjin, së bashku me kryetarin e Bashkisë së Lezhës, Pjerin Ndreu.
“Bashkia e ofron me kasë fiskale shërbimin e çadrave, të njëjtën gjë duhet ta bëjnë të gjitha subjektet private, që siç presin kupona fiskalë, në restorant, në hotel, do ta bëjnë këtë edhe për çadrat dhe shezlonget që ofrojnë.
Jemi në mbështetje të biznesit privat që të shtojë të ardhurat, të shtojë ekonominë, por po kështu duhet të shlyejë detyrimet ndaj shtetit që të mos kemi ekonomi informale”, tha ministrja.
Ndër të tjera, Kumbaroi kërkoi nga Policia Bashkiake, por edhe ajo e Shtetit që të ndëshkojë këdo që shkel rregullat edhe sa i përket mbetjeve.
“Përveç policisë bashkiake që ka detyrën kryesore, policia e Shtetit do të jetë në krahun tonë sepse është ndoshta viti me fluksin më të madh që kemi ndonjëherë dhe besoj do të jetë në rritje”, tha ajo.
