Djetëra mijëra protestues, mes tyre edhe familje me fëmijë, dolën në rrugët e qytetit të Hagës për të protestuar kundër bllokadës së Rripit të Gazës nga Izraeli.
Të veshur me të kuqe, ata i bënë thirrje qeverisë holandeze të ndërmarrë më shumë veprime kundër asaj që e cilësuan si “gjenocid” ndaj palestinezëve.
Sipas organizatorëve, kjo ishte protesta e dytë e madhe brenda një muaji, me pjesëmarrje që arrinte në rreth 150 mijë persona. Policia holandeze nuk dha një shifër zyrtare mbi pjesëmarrjen.
Protesta u organizua nga disa organizata ndërkombëtare të të drejtave të njeriut, përfshirë Amnesty International dhe Oxfam. Ato bënë thirrje për të vendosur një “vijë të kuqe” kundër asaj që e cilësojnë si sulme të vazhdueshme izraelite dhe krime të mundshme lufte ndaj palestinezëve.
Demonstruesit mbanin flamuj palestinezë dhe brohorisnin slogane si “Ndalo gjenocidin”. Disa nga pankartat lexonin: “Bëni diçka”, “Ndalo bashkëfajësinë e Holandës” dhe “Hesht kur fëmijët flenë, jo kur vdesin.”
Marshimi kaloi përpara Gjykatës Ndërkombëtare të Drejtësisë, e cila aktualisht po shqyrton një padi të ngritur nga Afrika e Jugut që akuzon Izraelin për gjenocid. Kjo gjykatë ndërkombëtare e ka urdhëruar më herët Izraelin të ndalojë ofensivën ushtarake në Rafah, në jug të Gazës, dhe të lejojë ndihmat humanitare.
