Sekretari i përgjithshëm i NATO-s, Mark Rutte reagoi menjëherë pas sulmit të Izraelit ndaj Iranit, duke bërë thirrje për uljen e tensioneve.
Aleatët e shtetit hebre duhet të punojnë urgjentisht për shmangien e një përshkallëzimi të situatës, ishte apeli i numrit një të aleancës më të madhe ushtarake të globit. Rutte u përpoq në të njëjtën kohë të qetësojë opinion publik, duke nënvizuar se bota nuk është në prag të një konflikti të plotë atomik.
“Jo, nuk jemi pranë një lufte bërthamore globale. Të gjithë tani duhet të fokusohen tek ç’tensionimi i situatës. Aleatët janë vënë të gjithë në punë për këtë qëllim”, shprehet shefi i NATO-s, Mark Rutte.
Në qendër të sulmeve të Izraelit ndaj Iranit qëndron program i diskutueshëm bërthamor i republikës islamike. Teherani pretendon se synon të zotërojë teknologjinë bërthamore për qëllime paqësore dhe mohon akuzat nga fuqitë perëndimore se po përpiqet të zhvillojë armë bërthamore. Por Agjencia Ndërkombëtare për Energjinë Atomike (IAEA), mbikëqyrësi bërthamor i OKB-së, prej kohësh e ka Iranin për shkelje të detyrimeve të tij në kuadër të mos-përhapjes bërthamore.
Të enjten, siç kujton CNN, për herë të parë pas gati 20 vitesh – agjencia miratoi një rezolutë që e shpallte Iranin në shkelje të këtyre detyrimeve. Një raport i IAEA-s në muajin maj, i parë nga Reuters, zbuloi se Irani kishte kryer aktivitete bërthamore të fshehta me materiale që nuk ishin deklaruar në tre objekte, që prej kohësh janë nën hetim.
