Në kishën e Shën Ndout në Laç është hapur për herë të parë këtë sezon veror Qendra Shëndetësore Verore.
Ministrja e Shëndetësisë dhe Mbrojtjes Sociale, Albana Koçiu tha në një postim në rrjetet sociale se “kjo qendër do të jetë në shërbim 24/7 për të gjithë qytetarët dhe pelegrinët që vizitojnë këtë vend të bekuar”.
“Shëndeti i çdo vizitori është prioritet për ne, ndaj me ekipin e mjekëve dhe infermierëve jemi të gatshëm të ofrojmë kujdesin e nevojshëm në çdo moment”, theksoi Koçiu.
Specialisti i Njësisë Vendore të Kujdesit Shëndetësor, Ermal Meraj tha se “kjo qendër është hapur së fundmi në kuadrin e nismës së MSHMS-së për t’i ofruar shërbim shëndetësor qytetarëve që vijnë në pikat turistike”.
“Qendra do të jetë e hapur 24/7 deri në fund të sezonit turistik. Ajo i vjen në ndihmë të gjithë qytetarëve që vijnë në kishën e Shën Ndout gjatë këtij sezoni turistik”, tha Meraj.
Në kishën e Shën Ndout në Laç mbyllet sot pelegrinazhi i përvitshëm i 13 të martave.
Besimtarët vijnë nga të gjitha qytetet e vendit, ku një pjesë e madhe e tyre qëndrojnë natën në ambientet përreth kishës, duke e kthyer këtë ngjarje në një moment të rëndësishëm shpirtëror.
