Kryetari i Bashkisë Lezhë, Pjerin Ndreu ndau në emisionin “Opinion” në Tv Klan disa nga zhvillimet që po transformojnë zonën e Tales.
Ai bëri me dije se “Balfin Group” po nis një projekt të madh, ndërsa investitorë të tjerë të rëndësishëm nga Shqipëria dhe jashtë po vënë në jetë investime të reja në këtë zonë, duke e kthyer Tale në një prej destinacioneve më të zhvilluara në dy-tre vitet e ardhshme.
Ndreu gjithashtu përmendi përmirësimet infrastrukturore, me tre aksese të reja që do të lehtësojnë hyrjen dhe daljen nga plazhi, por paralajmëroi se pa ndërtimin e autostradës Milot-Balldren, qyteti i Lezhës mund të përballet me sfida serioze nga rritja e shpejtë e zhvillimit të turizmit.
“Talja po merr një zhvillim. “Balfin Group” ka një super projekt për ta filluarc tani shpejt. “Dukagjini” do të fillojë një tjetër projekt në Tale, investitorë të tjerë shumë të mëdhenj nga Shqipëria dhe nga jashtë po investojnë në Tale. Talja ka një “boom” shumë të madh zhvillimi dhe për dy-tre vjet do të jetë një prej zonave më të zhvilluara.
Ne kemi filluar duke ia paraprirë, atë që nuk e kemi bërë më përpara, kemi futur dhe një aks tjetër për në Tale, që është autostradë Ril-Hidrovorë. Kemi bërë dhe një aks tjetër që fillon këto ditë, që nisa nga Rila dhe shkon në fshatin më të afërt të bregdetit në, pra fusim dhe një aks tjetër, që bëhen tre. Në kuptimin që futja në plazh të jetë më e shpejtë, por dalja, nëse nuk bëhet Milot-Balldreni sa më shpejt Lezha do të jetë një problem sepse “boom” është shumë i madh”, tha Pjerin Ndreu.
