Mund ta marrësh detin në këmbë vetëm në plazhin e Divjakës. Këtu është një mundësi e shkëlqyer për t’u ndier i sigurt gjatë pushimeve. Nuk ka asnjë mjet lundrues që të rrezikon jetën në të gjithë vijën bregdetare.
“Për shkak të cektësisë së detit, në këtë plazh mbetet i pamenaxhueshëm përdorimi i çdo lloj mjeti lundrues, duke i dhënë mundësi pushuesve të mos ndihen të rrezikuar në këtë plazh. Të paktën deri në 500 metra deti është aq i cekët sa mund të ecësh në këmbë dhe të luash pa frikë se mund të rrezikohet jeta nga mjetet lundruese”, raporton gazetarja Anila Sefa.
Stacioni i Policisë Kufitare ka disa vjet që nuk ka miratuar asnjë vendqëndrim për motorët e ujit, sepse nuk ka asnjë kërkesë për to.
“Stacioni i Policisë Kufitare në Divjakë nuk ka korridore për jet ski. Territori që ky institucion mbulon nis nga grykëderdhja e lumit Shkumbin deri në grykëderdhjen e lumit Seman. Nga informacionet e marra nga shefi i këtij stacioni, të paktën pesë vitet e fundit nuk është miratuar asnjë leje për vendqëndrimet e mjeteve lundruese në det. Madje, në vitin 2025 vetëm një qytetar nga Divjaka ka kërkuar leje në bashki për vendosjen e një pedaloni në plazh”, raporton gazetarja nga Policia Kufitare.
Deri tani nuk është regjistruar asnjë rast aksidenti të pushuesve nga jet ski në të gjithë vijën bregdetare të qarkut Fier si Divjakë, Seman dhe Darëzezë. Klan News
