Kreu i Partisë Demokratike, Sali Berisha në një dalje për mediat ka bërë një tjetër denoncim publik në lidhje me procesin zgjedhor, duke akuzuar qeverinë Rama për blerje masive votash dhe përdorim të fondeve publike në funksion të fushatës.
Gjatë fjalës së tij në këtë konferencë, Berisha publikoi një video që, sipas tij, tregon momentin e shpërndarjes së parave për vota në zonën e Babrrusë, në Tiranë.
Më tej Berisha u shpreh: “Narkoqeveria e Edi Ramës nuk u mjaftua me 76 milionë euro të shpërndara si ‘bonus pensionistësh’, që përbëjnë 48% të votuesve. As me 200 milionë euro të falura në gjoba dhe kamata, e as me firmosjen masive të lejeve të legalizimit e certifikatave të pronësisë. Përdorën makinat e shtetit, punësuan mijëra njerëz në mënyrë të përkohshme vetëm për të siguruar votën. Por kaluan edhe në blerje të drejtpërdrejtë të votës – me para në dorë.”
Sipas tij, ndonëse këto veprime bëhen në fshehtësi të madhe, qytetarë të vëmendshëm kanë arritur të filmojnë momentin kur ndahen para për votuesit – provë që Berisha e publikoi si pjesë të denoncimit.
Ai theksoi se kjo nuk ndodhi në zona të largëta apo të thella të vendit, por në kryeqytet, në Babrru, duke e konsideruar këtë si dëshmi të një “krimi elektoral të strukturuar”. Opozita pritet të paraqesë këto prova edhe në institucionet e drejtësisë, ndërsa kërkon hetim të plotë dhe të pavarur për rastet e pretenduara të manipulimit të votës.
