Zjarrfikësit duke tentuar të shuajnë zjarrin në një ndërtesë të goditur me dronin rus në Harkiv më 7 qershor.
Rusia ka kryer sulme masive përgjatë natës në Harkiv, qytetin e dytë më të madh të Ukrainës, derisa qytetarët kanë thënë se ky ka qenë sulmi më i fuqishëm prej nisjes së luftës së Moskës në tokën ukrainase, më 2022.
Si pasojë e sulmeve janë vrarë tre persona dhe janë plagosur 22 të tjerë, sipas kryetarit të qytetit, Ihor Terekhov dhe autoriteteve rajonale.
Sulmi ka nisur në orët e hershme të 7 qershorit. Banorët kanë raportuar për valë shpërthimesh teksa forcat ruse kanë nisur vazhdimisht raketa dhe dronë.
Kryetari i Harkivit e ka përshkruar, gjithashtu, sulmin si “ ofensivën më të fuqishme prej nisjes së luftës”, dhe që janë shënjestruar ndërtesa banimi, institucione edukative dhe infrastrukturë kritike.
Forca ajrore e Ukrainës ka raportuar se Rusia ka nisur 215 dronë dhe raketa dhe që 174 janë rrëzuar apo neutralizuar.
Harkivi gjendet vetëm pak kilometra prej kufirit rus, dhe është përballur me bombardime të ashpra përgjatë konfliktit të nisur tre vjet më parë.
Ky përshkallëzim raportohet teksa zhvillohen negociata për armëpushim dhe pas një operacioni ukrainas me dronë që ka dëmtuar asete ushtarake ruse, përfshirë aeroplanë ushtarakë në thellësi të territorit rus, çka ka turpëruar Kremlinin.
Përgjatë një konference për media, më 5 qershor, në Shtëpinë e Bardhë, presidenti amerikan, Donald Trump e ka krahasuar luftën në Ukrainë me përplasjet mes fëmijëve.
“Ndonjëherë i shihni dy fëmijë të vegjël duke luftuar si të çmendur, që urrejnë njëri-tjetrin dhe po luftojnë në park. Ndonjëherë është më mirë që t’i lejojmë që të luftojnë edhe për një kohë dhe më pas t’i ndalim”, ka thënë ai.
Presidenti ukrainas, Volodymyr Zelensky e ka kundërshtuar analogjinë e Trumpit,
“Ne nuk jemi fëmijë me Putinin në hapësirën e një parku. Ai është vrarës që ka ardhur në park për të vrarë fëmijë”, ka thënë Zelensky në një intervistë./REL
