Turizmi në vendin tonë, i cili pritet që këtë sezon të jetë në trend rritës krahasuar me vitet e tjera, ka dhe ndikimin e saj pozitiv në ekonominë e Shqipërisë.
Eksperti i ekonomisë, Selami Xhepa, është shprehur “Përballë Lajmit”, në Klan News, se sektori i turizmit në vendin tonë është kthyer në një faktor të rëndësishëm për zhvillimet e brendshme makro-ekonomike. Sipas Xhepës, qytetarë kanë investuar vitet e fundit në tregun e pasurive të paluajtshme, për t’i përdorur ato si struktura akomoduese për të gjithë turistët e huaj apo vendas. Ky investim përkthehet gjithashtu në të ardhura, kryesisht për ekonominë familjare.
“Shqipëria është shndërruar në një sektor shërbimesh, jo vetëm për brenda vendit, por edhe për jashtë vendit. Duke e bërë këtë, si të thuash, faktorin më të rëndësishëm për të konsoliduar le të themi zhvillimet e brendshme makro-ekonomike. Nga ana tjetër, duke qenë se turizmi është i lidhur me një, do thoja me një popullsi masive të vendit, ka e një efekt në shpërndarjen e të ardhurave. Fakti që një pjesë e madhe e qytetarëve kanë investuar në tregun e pasurive të paluajtshme gjatë këtyre viteve dhe i përdorin tashmë për qëllime investimi, apo riinvestimi, ose për akomodimin e turizmit, do të thotë që këto sigurojnë të ardhura jo vetëm thjesht në kuptimin makro-ekonomik, por nga ana tjetër, kanë një efekt të drejtpërdrejtë në të ardhurat e familjeve”, tha Xhepa.
Ajo që ka ndihmuar shumë në shtimin e të ardhurave nga sektori i turizmit, është struktura akomoduse. Kjo e fundit ka qenë një zë i rëndësishëm sipas eksperit për sjelljen e të ardhurave financiare. Në vend të dytë, mbetet kulinaria.
“Statistikat që jep Banka e Shqipërisë, se Banka e Shqipërisë i harton statistikat e bilancit të pagesave, janë në tërësinë e tyre, por normalisht vetë industria dhe operatorët turistikë kanë njohje më të plota, meqenëse ata si të thuash janë përditë në këtë lloj biznesi. Duket qartazi se strukturat e akomodimit e kanë rolin më të madh, ndoshta më pak në sektorë të tjerë, siç janë do thoja turizmi kulturor, apo aktivitete të tjera sportive. Për momentin, fokusin kryesor i turizmit, nga pikëpamja e burimit e të ardhurave, janë qoftë akomodimi, padiskutim edhe kulinaria. Këto janë edhe dy shërbimet kryesore që kontribuojnë në thesin e madh e të ardhurave që siguron ekonomia nga ky aktivitet”, shprehet eksperti i ekonomisë.
Xhepa sqaron se zhvillimi i sektorit të turizmit, ka arritur të triumfojë mbi atë të eksportit të mallrave, lidhur me nivelin e të ardhurave për buxhetin e shtetit. E gjitha kjo, sipas ekspertit, vjen për shkak të fuqizimit të monedhës tonë, që ka sjellë pasoja negative për eksportin, por pozitive për sektorin e shërbimeve.
“Është gati më shumë se 10% e GPT, çka e bën edhe më të rëndësishme se eksporti i mallrave. Faktikisht, eksporti i mallrave ka pasur një rënie gjatë viteve të fundit për shkak të fuqizimit të monedhës tonë kombëtare dhe zhvlerësimit të euros. Ky efekt negative, që është kompensuar më shumë në rritjen e të ardhurave nga sektori i shërbimeve”, tha Xhepa./tvklan.al
