Ishte një sulm befasues i suksesshëm i Ukrainës brenda tokës ruse.
Ukraina raporton më shumë se 40 avionë të shkatërruar rusë.
Presidenti ukrainas Volodymyr Zelensky e ka përshëndetur sulmin e papritur të shërbimit të tij sekret SBU kundër disa aeroporteve ushtarake ruse si një “sukses absolutisht të shkëlqyer”. Zelensky tha se ky sulm do të hyjë “në librat e historisë”.
Sulmi ishte operacioni më i gjerë i Ukrainës në luftë deri më tani. Sipas shërbimit sekret ukrainas, SBU, rreth 34 përqind e bombarduesve strategjikë të aftë për të hedhur raketa u shkatërruan ose u dëmtuan. Ushtria ruse i përdorte avionët e sulmuar “për të bombarduar qytetet ukrainase çdo natë”, thuhet nga SBU.
Thuhet se janë goditur edhe avionë paralajmërues A-50, të krahasueshëm me avionët AWACS të NATO-s. Sulmet thuhet se u drejtuan, ndër të tjera, kundër bazës ushtarake ruse në Belaya në Siberinë Lindore, e cila ndodhet në rajonin e Irkutskut, rreth 4,200 kilometra nga kufiri ukrainas.
Ministria ruse e Mbrojtjes ka konfirmuar se disa avionë rusë u përfshinë nga flakët gjatë sulmeve me dronë ukrainas në rajonet Murmansk dhe Irkutsk. Dronët u qëlluan drejt avionëve nga zonat “shumë pranë” të fushave ajrore.
Bisedime në Stamboll
Nga ana tjetër Ukraina njoftoi se do të dërgojë në Stamboll të hënën (02.06.) një delegacion për rundin e ardhshëm të negociatave për armëpushim me Rusinë.
Bisedimet planifikohet të zhvillohen të hënën. Delegacioni ukrainas do të udhëhiqet nga ministri i Mbrojtjes, Rustem Umyerov, tha Presidenti ukrainas Volodymyr Zelenski. Deri tani Kievi e kishte lënë të hapur, nëse do të merrte pjesë në raundin e dytë të bisedimeve të propozuar nga Rusia.
Sipas burimeve në Ministrinë e Jashtme turke bisedimet midis Ukrainës dhe Rusisë në Stamboll pritet të fillojë të hënën pasdite, në orën 13:00 sipas kohës lokale në Pallatin Ciragan.
Ukraina qëndron tek kushtet e njohura për marrëveshjen e paqes
Ukraina nuk e ka ndryshuar kornizën e saj të kushteve për një përfundim të mundshëm të luftës. Kjo merret vesh nga një dokument i siguruar nga agjencia e lajmeve Reuters, i cili pritet të jetë baza për bisedimet e së hënës në Stamboll.
Sipas tij planifikohet një armëpushim prej të paktën 30 ditësh si dhe shkëmbimi i të gjithë të robërve të të luftës. Po ashtu fëmijët ukrainas që janë çuar në territorin rus duhet të rikthehen në atdheun e tyre. Më pas do të ketë një takim midis Presidentit ukrainas Volodymyr Zelenski dhe atij rus Vladimir Putin./DW
