Vajza e kryeministres italiane, Giorgia Meloni është sulmuar dhe kërcënuar, përmes një postimi në rrjete sociale.
Publikimi i mesazhit ishte bërë nga një përdorues i Instagram-it, që sipas informacioneve punon në Ministrinë e Arsimit.
Autori i uronte vajzës së Kryeministres Giorgia Meloni, Ginevra, të njëjtin fat tragjik si Martina Carbonaro, vajza e re nga Afragola e vrarë nga i fejuari i saj.
“I uroj vajzës së Melonit të ketë të njëjtin fat si vajza nga Afragola”, shkruajti në instagram një ish-punonjës i dyshuar i Ministrisë së Arsimit.
Ndërkohë Meloni thotë se ky mesazh nuk ka lidhje me fushën politike, por sipas saj është diçka më e errët, që flet për një urrejtje ideologjike.
“Kjo nuk është përplasje politike, nuk është as zemërim.
Është diçka më e errët, që flet për një klimë të sëmurë, një urrejtje ideologjike, në të cilën gjithçka duket e lejueshme, madje edhe dëshira për vdekjen e një fëmije për të sulmuar një prind.
Dhe është kundër kësaj klime të dhunshme që politika, e gjithë kjo, duhet të dijë të bashkohet.
Sepse ka kufij që nuk duhen kaluar kurrë.
Dhe mbrojtja e tyre është një përgjegjësi që shkon përtej çdo përkatësie”, shprehet Meloni.
