Rusia dhe Ukraina kanë realizuar një tjetër shkëmbim të të burgosurve këtë fundjavë, në atë që konsiderohet si një nga më të mëdhatë që nga fillimi i luftës më shumë se tre vite më parë.
Të dielën, të dyja palët konfirmuan lirimin të 303 personave nga secila palë, ushtarakë dhe civilë, duke e çuar në mbi 1,000 numrin total të të burgosurve të shkëmbyer gjatë tri ditëve të fundit.
Kjo përbën një nga rastet e rralla të bashkëpunimit mes dy vendeve, në një kohë kur përpjekjet për arritjen e një armëpushimi kanë dështuar vazhdimisht.
Presidenti ukrainas, Volodymyr Zelensky, konfirmoi shkëmbimin përmes një postimi në rrjetin “X”, duke nënvizuar se mes të liruarve ishin pjesëtarë të Forcave të Armatosura, Gardës Kombëtare, Shërbimit të Kufirit dhe Shërbimit Shtetëror të Transportit Special.
Ndërrimi i së dielës pasoi dy shkëmbime të tjera gjatë të premtes dhe të shtunës, ku u liruan përkatësisht 390 dhe 307 persona nga secila palë.
Ky zhvillim vjen në një moment të tensionuar, vetëm pak orë pasi Kievi dhe rajone të tjera të Ukrainës u goditën nga një sulmi më i madh ajror rus me dronë dhe raketa, që nga nisja e agresionit në Shkurt 2022. Të paktën 12 persona u vranë dhe dhjetëra të tjerë u plagosën.
Marrëveshja për ndërrimin e të burgosurve u arrit gjatë një takimi të zhvilluar në fillim të muajit në Stamboll, ku përfaqësues të të dyja vendeve u ulën ballë për ballë në një përpjekje për rifillim të bisedimeve. Palët ranë dakord të lirojnë nga 1,000 të burgosur secila.
Pavarësisht këtij akti bashkëpunimi, lufta vazhdon, duke lënë të hapur pyetjen nëse shkëmbimi i të burgosurve do të sjellë ndonjë ndikim në situatën e përgjithshme të konfliktit.
