Edhe pse arriti të merrte mbi 18 mijë vota preferenciale, mjeku i njohur Ilir Alimehmeti nuk arriti që të siguronte një mandat në zgjedhjet e 11 majit.
I ftuar në studion e Klan News me gazetarin Besard Jacaj, Alimehmeti shprehet se edhe pse jemi në 2025, ne nuk jemi të aftë akoma të ofrojmë zgjedhje të lira dhe të ndershme në Shqipëri.
Alimehmeti shtoi se dy elemente kryesor që mungojnë në vendin tonë janë demokracia funksionale dhe kushtetueshmëria.
“Ne kemi një situatë ku në 2025 ne marrim notë të ulët apo kaluese, që nuk jemi të aftë akoma të ofrojmë zgjedhje të lira dhe të ndershme në Shqipëri. Ky është problemi jonë i të gjithëve ne. Asnjë nuk përjashtohet.
Ky arsyetim dhe pastaj do i hyjmë edhe konceptit se si është keqmenaxhuar ligji për t’i larguar zgjedhësit nga të zgjedhurit sepse ky është problemi, ne do të gjejmë një situatë ku besoj unë që në qoftë se kërkojmë një vend me demokraci funksionale dhe kushtetueshmëri, Shqipëria po i largohet gjithmonë e më shumë këtyre dy elementeve dhe si rrjedhojë shqiptarët që kërkojnë demokraci funksionale dhe kushtetueshmëri, po largohen nga Shqipëria. Në 2025 nuk është më çështje personale, por është çështje kombëtare”,shprehet Alimehmeti.
Ndër të tjera, Alimehmeti është ndalur edhe tek raporti paraprak i OSBE/ODIHR, ku përmendi disa pika të këtij raporti.
“Unë do t’i qëndroj raportit të OSBE/ODIHR. Është raporti paraprak dhe do flasim për atë që kemi në dorë që thotë garë e pabarabartë mes kandidatëve, përdorim administrate, përdorim parash, përdorim bandash kriminale. I shohim se tani arrestohen ato. Mbani mend faljen e gjobave. Ky është vendim i jashtëligjshëm dhe është i përmendur në raportin e OSBE/ODIHR. Unë jam kundër gjobëzimit të kotë”, shprehet kandidati demokrat.
Teksa u pyet nëse Partia Demokratike duhet të bëjë një analizë të brendshme pas humbjes së herëpashershme në zgjedhje, Alimehmeti u shpreh se analizat janë të nevojshme gjithmonë si në rast humbje dhe fitoreje.
“Gjithmonë. Analizat duhet të bëhen gjithmonë edhe në rastet kur fiton edhe në rastet kur nuk fiton. Ku e dini ju që s’po bëhen. Unë jam institucional. Etapat nuk digjen. Procesi mbaron kur të mbarojë procesi, jo kur të duam në. Kur të mbarojë procesi, unë jam ende në proces. Secili bën analizat e veta. Gjithmonë ka mundësi për tu përmirësuar. Unë nuk kam kohën për tu fokusuar, por duhet bërë analiza për të parë se cilat elemente funksionuan mirë dhe cilat keq”, thekson Alimehmeti.
E ndërsa u pyet nëse pas kësaj humbje të rradhës të Partisë Demokratike, a duhet të largohet lideri demokrat Sali Berisha nga drejtimi i partisë, Alimehmeti u shpreh se për këtë ka një proces dhe në fund vendos Kryesia.
“Mbaron procesi, bëhet analiza, mblidhet Kryesia sepse Kryesia duhet të mblidhet bashkë me kryetarin dhe marrin ato vendimet dhe qëndrimet e tyre dhe i bëjnë publike. Unë mendoj në këtë linjë. Mneodj që çdo forum ka privilegjet dhe përgjegjësitë e veta”, shprehet Ilir Alimehmeti.
Kujtojmë se Ilir Alimehmeti ishte në një garë të fortë me Jorida Tabakun për mandatin në listën e hapur në Tiranë, ku edhe pse morri 18 mijë e 125 vota, nuk siguroi dot karrigen për në Parlament.
Nga votimi brenda vendit, Tabaku fitoi 19 025 vota, ndërsa nga diaspora 1 540 të tilla, duke dalë kështu si më e votuara. Nga ana tjetër, Alimehmeti nga brenda vendit fitoi 16 595 vota, ndërsa nga jashtë 1 530 vota.
/tvklan
