Ka dështuar për herë të 15 seanca për konstituimin e Kuvendit të Kosovës. Siç raportojnë mediat në Kosovë, të martën dështoi formimi i Komisionit për votim të fshehtë për zgjedhjen e kryeparlamentarit. Deputetët u mblodhën për rreth pesë minuta për një tjetër dështim. Pro votuan 56, kundër një. Seanca e ardhshme do të mbahet më 15 maj me fillim prej orës 10:30. Kryetari i Partisë Demokratike të Kosovës, Memli Krasniqi, e ka quajtur të pakuptimtë insistimin e Lëvizjes Vetëvendosje që Albulena Haxhiu të jetë kandidate për kryetare të Kuvendit.
Ai ka deklaruar para mediave pas seancës që dështoi për herë të 15-të se VV-ja duhet të ndërrojë kandidatin duke shtuar se s’i ka numrat.
“Ky insistim i Kurtit për Albulena Haxhiun është i pakuptimtë dhe është pasiguri e tij në faktin e njohur dhe të dëshmuar që s’i ka numrat për shumicë parlamentare. Unë si kryetar i PDK-së do të vazhdoj të insistoj për një qasje zhbllokuese, jo vetëm për ndërrim të kandidatit. Por më vjen mirë që presidentja Vjosa Osmani e ka pranuar propozimin tonë për të ftuar një takim me të gjitha partitë politike. Shpresoj që të gjithë t’i përgjigjen pozitivisht”, ka deklaruar Krasniqi.
Ndërkohë presidentja Vjosa Osmani pritet t’i nisë takimet me partitë në konsulta për dalje nga ngërçi.
Kuvendi konsiderohet i konstituuar vetëm pas zgjedhjes së kryetarit dhe nënkryetarëve. Në herët e shkuara, Lëvizja Vetëvendosje si subjekti më i madh nga zgjedhjet ka propozuar emrin e Albulena Haxhiut e cila nuk mori mbështetjen nga deputetët.
