E ndërsa 6 ditë na ndajnë nga zgjedhjet parlamentare të këtij vendi, partitë politike janë mobilizuar për të kërkuar votën qytetarëve, e këtu nuk bën përjashtim as kreu i qeverisë, Edi Rama.
Ky i fundit, e kërkon votën me “ngulm”, duke luajtur kartën e anëtarësimit evropian, rëndësinë e saj për Shqipërinë dhe benefitet që u jep ajo për të ardhmen e fëmijëve të këtij vendi.
Rama pati një thirrje për demokratët, që të “sakrifikohen” në këto zgjedhje, duke votuar Partinë Socialiste, në mënyrë që fëmijët e tyre të përfitojnë pasaportën evropiane, për të cilën kryesocialisti shpesh herë e ka cilësuar si një vlerë qytetarie në kontinent.
“Duhet të votojnë për fëmijët e tyre, që t’u japin pasaportën evropine. E kur fëmijët të kuptojnë për çfarë bëhet fjalë, të thonë për këtë pasaportë, baba e nëna jote bën një sakrificë shumë të madhe, votuan për një maskara si Edi Rama. Por ama pasaportën na dhanë. Që Edi Rama ishte burrë i mirë nuk e thonë ata. Le të thonë ç’të duan për mua, puna është të votojnë për 5″, tha Rama.
Në të kundërt, kryeministri dha një “këshillë”, të ndjekur nga ai në vitin 1992, që ata që nuk votojnë Partinë Socialiste më 11 Maj, mos të votojnë aspak për asnjë parti tjetër që t’i hapet rruga shumicës, siç shprehet ai.
“Nëse nuk e kapërcejnë dot këtë fare, duhet të bëjnë atë që bëra unë në Mars të ’92. Nuk vajta fare të votoja. Se unë nuk votoja dot fare për bufin, me thënë të drejtën, se ja dëgjoja erën që kur e kam parë në minutën e parë atje tek Qytet Studenti. Por, nuk vajta të votoja për askënd tjetër. Sepse kush nuk shkon të votojë, i hap rrugën opsionit të shumicës. Kështu është rregulli. Patjetër që unë u bashkova me ata qe i hapën rrugën Shqipërisë që të dilte nga gjithë errësira e gjatë e komunizmit, e hynte në një rrugë të re, drejt Evropës”, tha Rama.
