Presidenti amerikant Donald Trump ka reaguar për sulmet ruse në Kiev, ku mbetën të vrarë 9 persona e dhjetëra të tjerë u plagosën.
Në rrjetin e tij social Truth, Trump apelon Putin të ndalojë, ndërsa kërkon të arrihet sa më parë marrëveshja e paqes.
“Unë nuk jam i kënaqur me sulmet ruse në Kiev. Të panevojshme, dhe në një kohë shumë të keqe. Vladimir, STOP! 5000 ushtarë në javë po vdesin. Le të kryhet Marrëveshja e Paqes!”-shkruan Trump.
Në orët e para të ditës së sotme, Rusia lëshoi raketa dhe drone në Kiev, ku raportohen zyrtarisht 9 të vdekur dhe të paktën 70 të plagosur nga shërbimet e emergjencës. Sulmi u komentua nga Përfaqësuesja e lartë për politikën e jashtme të BE Kaja Kallas. Ajo shkroi në “X” pas sulmeve se pengesa për paqen nuk është Ukraina, por Rusia.
