Thuajse 90% e hoteleve në Durrës janë të rezervuara me shtetas nga Kosova këtë fundjavë, të cilët kanë zgjedhur Shqipërinë për të festuar Pashkët.
“Kjo fundjavë i është dedikuar turistëve nga Kosova. Ka shumë rezervime nga shtetas nga Kosova që kanë preferuar të vijnë në Shqipëri.”
Por nuk mungojnë as vizitorët vendas dhe ata të huaj, kryesisht nga Bullgaria.
“Tashmë është bërë si traditë, se kanë më shumë se 5-6 vite që vijnë në Shqipëri dhe festojnë në grupe të organizuara festën e Pashkëve.”
Krahas akomodimit, operatorët turistikë kanë ofruar edhe paketa festive për këtë fundjavë.
“Ne kemi përgatitur ofertat tona, zakonishtë janë me vakte të përfshira, që variojnë nga 40 deri në 50 euro personi.”
Durrësi duket se po konsolidohet gjithnjë e më shumë si një nga destinacionet më të preferuara për pushime, por edhe festa, jo vetëm për afërsinë gjeografike, por edhe për mikpritjen e ngrohtë dhe ofertat që ofron./Tv Klan
