Sekretari i Përgjithshëm i Partisë Socialiste Blendi Klosi gjatë një dalje në emisionin “Opinion” ka shpjeguar listat e kandidatëve për deputetë të forcës që ai përfaqëson.
Klosi tha se listat janë bërë nga strukturat e partisë në terren me propozimet që kanë ardhur nga baza por duke u konsultuar me drejtuesit e qarqeve dhe padyshim me kryetarin e partisë.
I pyetur nga gazetari Blendi Fevziu lidhur me emrat ministrash apo deputetësh aktualë të lënë jashtë listave të mbyllura, Klosi tha se kjo është bërë me qëllim mbledhjen e sa më shumë votave.
“Filozofia është e shprehur qartë tashmë, deputetët që kanë një mandat përveç drejtuesve politikë, janë në garë dhe në terren për të mbledhur sa më shumë vota. Të gjithë ata që janë në lista të mbyllura kanë nga një gjykim përse janë aty, ndërsa gjithë pjesa e partisë është në listën e hapur. Kjo nuk është praktikë e re, është praktikë e provuar për ne, që gara në terren është shumë e rëndësishme”, u shpreh Klosi./Opinion.al
