Gjashtë shtetas shqiptarë janë arrestuar pasi akuzohen për një seri grabitjesh të artikujve luksozë dhe bizhuterive në Francë dhe Belgjikë. Grupi ka realizuar më shumë se 49 vjedhje në rezidenca të personazheve të njohur dhe të pasur, të botës së artit, sportit etj…
Grupi kriminal është pagëzuar me emrin “Nikla” nga autoritetet franceze. Ai drejtohej nga një kriminel shqiptar, i cili ishte arratisur në 2022 nga burgu i Trevizos në Itali dhe kërkohej nga Interpoli.
Edison Pula, së bashku me një tjetër grabitës u arrestuan më 20 janar në Luksemburg, ndërsa pesë të tjerët u kapën më 4 mars pranë Reims. 30-vjeçari i lindur në Krujë është dënuar me 14 vjet burgim, për vepra penalet “vrasja me paramendim”, “shkatërrimi i pronës me eksploziv”, “vjedhja me dhunë”, “mbajtja pa leje dhe prodhimi i armëve, armëve shpërthyese dhe i municionit”, “vjedhja” dhe “largimi i të burgosurit nga vendi i qëndrimit”.
Ai u identifikua falë profilit të tij gjenetik, të zbuluar në më shumë se 30 vendngjarje të ndryshme të grabitjeve.
Sipas autoriteteve, vlera e sendeve të vjedhura nga grupi i Pulës tejkalon një milion euro. Gjatë operacionit, policia sekuestroi mbi 650.000 euro sende të vjedhura, duke përfshirë bizhuteri, orë të shtrenjta, çanta luksi, para cash dhe automjete.
Hetimet zbuluan se viktimat kryesore ishin biznesmenë të zonës së Reimsit dhe futbollistë të njohur. Ky operacion u udhëhoq nga Zyra Qendrore Kundër Kriminalitetit të Organizuar dhe Policia Gjyqësore e Parisit.
