“Numri i divorceve në Shqipëri ka shënuar një rritje të ndjeshme në vitin 2024, duke arritur në 6 632 raste, rreth 1 mijë më shumë sesa në vitin 2023.”
Faktorët ekonomikë, dhuna, emigracioni, ndryshimi i pritshmërive mes partnerëve janë ndër arsyet kryesore të krizave martesore.
Drita Avdyli, Dhoma Kombëtare e Ndërmjetësve: “Është shoqëria në krizë, janë familjet në krizë, kanë ndikuar edhe shkaqet ekonomike po dhe emigracioni ka ndikuar, kemi shumë raste nga dhuna në familje. Vijnë raste që nuk kuptohen më ose kur dashuria ka mbaruar.”
Ndërsa numri i divorceve të përfunduara është rritur, sipas të dhënave të marra nga Ministria e Drejtësisë kërkesat e reja për zgjidhje martese kanë shënuar rënie. Tendenca e ndarjeve nuk është e kufizuar vetëm tek çiftet e reja, ndërsa shumica e kërkesave bëhen nga gratë.
Drita Avdyli, Dhoma Kombëtare e Ndërmjetësve: “Nuk ka moshë në ndarjen e familjeve. Gjatë vitit të kaluar ishte mosha nga 40-50 dhe kërkesat kanë ardhur nga gjinia femër.”
Një tjetër prirje në rritje në vitin 2024 është shtimi i kërkesave për divorc me marrëveshje ndërmjetësimi, duke shmangur proceset e gjata gjyqësore.
Drita Avdyli, Dhoma Kombëtare e Ndërmjetësve: “Janë mbi 2 mijë raste të zgjidhura me ndërmjetësim gjatë vitit 2024, ndërsa në vitin 2023, 1200-1300. Janë rritur shumë sepse palët janë ndërgjegjësuar, vetëm me një seancë çështja mund të zgjidhet… Jo vetëm që qytetari e ka zgjidhjen shumë shpejt po dhe gjykatat ulen nga ngarkesat e tyre.”
“Tirana, Durrësi, Elbasani dhe Fieri kryesojnë listën e qyteteve me numrin më të lartë të divorceve për vitin 2024, ndërsa Kukësi, Gjirokastra, Saranda dhe Dibra kanë shënuar numrin më të ulët.”
